QR Májilisi jýrnalısterge arnalǵan akkredıtteý qaǵıdasyn bekitti
ASTANA. QazAqparat - Palata spıkeri Nurlan Nyǵmatýlınniń tóraǵalyǵymen ótken Májilis Bıýrosynyń otyrysynda Parlamenttiń ekinshi sessııasynyń ashylýynda Qazaqstan Prezıdenti Nursultan Nazarbaev aıtqan basymdyqtar talqylandy, dep habarlady tómengi palatanyń baspasóz qyzmeti.
Depýtattar nazaryn Parlament Palatasynyń qyzmetin qoǵam úshin barynsha ashyq etý qajettigi týraly Memleket basshysynyń mindetine aýdarǵan N. Nyǵmatýllın zańnyń jańalyqtaryn talqylaý ashyqtyǵy qajettigin atap ótti. Bul rette Májilis spıkeri áriptesterin parlamenttik jýrnalıster úshin jumys toptary men komıtetter otyrystaryn barynsha qoljetimdi etýge shaqyrdy.
Jumys tártibi men BAQ ókilderin akkredıtteý ekinshi sessııa ashylǵannan keıin birden Májilis Bıýrosy bektitken qaǵıdalarda aıqyndaldy.
Bıýroda qaralǵan Májilistiń aldaǵy plenarlyq otyrysy kún tártibiniń jobasy da el Preıdentiniń jańa mindetterin eskerip, qalyptastyryldy.
Halyq qalaýlylary nazaryna «1994 jylǵy 15 sáýirdegi Uly Otan soǵysynyń qatysýshylary men múgedekterine, basqa memleketterdiń aýmaǵyndaǵy urys qımyldaryna qatysýshylarǵa, qaza tapqan áskerı qyzmetshilerdiń otbasylaryna arnalǵan jeńildikter men kepildikterdi ózara taný týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» Zań jobasyn talqylaý usynylady.
Sonymen qatar, taǵy da birqatar ratıfıkatsııalyq qujattardy jumysqa qabyldaý kózdelgen. Olar: Qazaqstan Úkimeti men Atom energııasy jónindegi halyqaralyq agenttik arasyndaǵy Qazaqstanda Atom energııasy jónindegi halyqaralyq agenttiktiń Tómen baıytylǵan ýran bankin qurý, Qazaqstan Úkimeti men Bilim, ǵylym jáne mádenıet máseleleri jónindegi Birikken Ulttar Uıymy (ıÝNESKO) arasyndaǵy Qazaqstanda Ortalyq Azııa óńirlik glıatsıologııalyq ortalyǵyn qurý (2-sanat) týraly kelisimderdi, Qazaqstan men Reseı arasyndaǵy qosarlanǵan salyq salýdy boldyrmaý jáne tabys pen kapıtalǵa salyq tóleýden jaltarýǵa jol bermeý týraly konventsııa sheńberinde eki eldiń ýákiletti organdary bergen rezıdenttikti rastaıtyn resmı qujattardy taný tártibi týraly notalar almasý nysanyndaǵy úkimetaralyq kelisimdi ratıfıkatsııalaýǵa qatysty bolmaq.
Sondaı-aq, ekstremızmge jáne terrorızmge qarsy is-qımyl jáne de jergilikti ózin-ózi basqarýdy damytý máseleleri boıynsha ózgerister men tolyqtyrýlar engizý týraly zań jobalary boıynsha beıindi komıtetterge qorytyndy ázirleý merzimi taǵaıyndalmaq.
