QR Májilis depýtaty Japonııanyń Kúnshyǵys ordenimen marapattaldy
ASTANA. QazAqparat - Japonııa úkimeti QR Parlamenti Májilisiniń depýtaty Nurlan Dýlatbekovti Imperator atynan Kúnshyǵys ordenimen marapattady, dep habarlaıdy "QazAqparat" HAA Qazaqstandaǵy Japonııanyń elshiligine silteme jasap.
Nurlan Dýlatbekov - Qazaqstandaǵy japon áskerı tutqyndaryn zerttegen tanymal ǵalym. Ol osy taqyrypta úlken kitap jazǵan. Soǵys kezinde Qazaqstanda tutqynda bolǵan japondyq Ahıko Tetsýronyń ómiri týraly baıandalǵan «Aqtastan shyqqan Ahıko» spektakliniń qoıylýyna muryndyq bolǵan.
Ahıko Tetsýro Keńes odaǵy kezinde Stalın repressııasynyń qurbanyna aınalǵan. Nebary 17 jasynda Qarlag tutqyny boldy. Spassk lagerinde 6 jylyn ótkizdi. Lagerden bosap shyqqan soń ol Qaraǵandynyń Aqtas degen jerinde turaqtap qalady.
Keıin Shahtaǵa ornalasady, zaýytta dánekerleýshi bop jumys jasaıdy. Tetsýro ýkraın qyzy Elenaǵa úılenip, odan 4 bala súıgen. 1989 jyly Ahıko Tetsýro tolyǵymen aqtaldy.
Jarty ǵasyrdan soń ǵana Kúnshyǵys eline baryp, týǵandarymen kórisken. Japonııa úkimeti oǵan páter syılaǵan. Alaıda, onda 3 jyl turǵan soń, Ahıko qarııa Qazaqstandaǵy aýylyna qaıtyp kelgen.
Eske salaıyq, byltyr Muhtar Áýezov atyndaǵy akademııalyq drama teatry Japonııaǵa gastroldik saparmen baryp, «Aqtastan shyqqan Ahıko» qoıylymyn qoıǵan edi. «Aqtastan shyqqan Ahıko» qoıylymynyń premerasy 2017 jyly 21-25 jeltoqsan aralyǵynda Tokıoda ótti.
Foto:vistanews.ru
