QR Májilis depýtattary Afınada birqatar kezdesýler ótkizdi
ALMATY. QazAqparat - Qazaqstan men Grekııa arasyndaǵy dıplomatııalyq qarym-qatynastarynyń 25 jyldyǵyna oraı 19-20 qazanda Halyqaralyq ister, qorǵanys jáne qaýipsizdik jónindegi komıtetiniń múshesi - «Qazaqstan - Grekııa» parlamentaralyq dostyq tobynyń teń tóraǵasy Abaı Tasbolatov bastaǵan QR Parlamenti Májilisi delegatsııasy Afınaǵa bardy, dep habarlaıdy QazAqparat tilshisi Grekııadaǵy QR Elshiligine silteme jasaı otyryp.
«Afınada depýtattar A.Tasbolatov pen A.Qońyrov óz áriptesterimen eki eldiń parlamentteri men halyqaralyq parlamenttik qurylymdyq salalarynda (Parlamenttik Assableıa, EQYU, Eýropa Keńesiniń Parlamenttik Assambleıasy jáne t.b.) ózara is-árekettestik boıynsha aýqymdy máselelerdi talqyǵa saldy», - delingen habarlamada.
Atap aıtqanda, Grek Respýblıkasy Parlamenti Tóraǵasynyń orynbasary M.Georgıadıs, Óndiris pen saýda máseleleri boıynsha komıtetiniń basshysy H.Kafantarı, Ulttyq qorǵanys pen syrtqy saıasat máseleleri boıynsha komıteti basshysynyń orynbasary D.Emmanoýılıdıs, Parlamenttiń burynǵy spıkeri V.Polıdoras jáne «Grekııa-Qazaqstan» parlamenttik dostyq tobynyń teń tóraǵasy L.Grıgorakos sekildi Grekııa Parlamentiniń joǵary sanatty ókilderimen arada kezdesý ótken.
Kelissózder barysynda taraptar ortaq múddelerimizge saı saýda men ınvestıtsııa, mádenıet pen ǵylym, týrızm sekildi salalarda yntymaqtastyqty órbitý, parlamentaralyq únqatysý máselesin odan ári nyǵaıtýdy kóterdi.
Májilis depýtattary táýelsizdik jyldary ishinde memleketimizdiń qol jetkizgen jetistikteri, Elbasy N.Á.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» pen «Bolashaqqa baǵdar: rýhanı jańǵyrý» atty baǵdarlamasy, QR Parlamenti ókilettikterin keńeıtý men Úkimettiń áleýmettik-ekonomıkalyq sheshimderi boıynsha jaýapkershiliginiń arttyrý baǵytynda júrgizilip jatqan saıası reformalar jaıly aqparattarmen bólisti.
Sonymen qatar, Májilis depýtattary grekııalyq áriptesterine Elbasy júrgizip otyrǵan Qazaqstannyń syrtqy saıasaty, derbes elimizdiń BUU Qaýipsizdik Keńesinde turaqsyz múshe retinde atqaryp jatqan júmystaryn baıandap berdi.
Grekııa Parlamentiniń ókilderi qol jetkizilgen «Qazaqstan Respýblıkasy men Eýropalyq odaq arasynda keńeıtilgen seriktestik jáne yntymaqtastyq týraly kelisimine» joǵary baǵa berip, jýyq aılar ishinde atalǵan mańyzdy qujatty ratıfıkatsııadan ótkizýge ázirlikterin jetkizdi.
Suhbattar barysynda depýtattar eki memleket arasynda «dostyq kópirine» aınalǵan, Qazaqstanda ǵumyr keshetin grekııa dıasporasynyń mańyzdylyǵyn aıryqsha atady. Bul oraıda, grekııalyqtar qoǵam ishinde beıbitshilik pen kelisimdi dáripteıtin Qazaqstan halqy Assambleıasynyń qurylý tarıhy men qyzmetiniń tájirıbesimen tanysýǵa qyzyǵýshylyq tanytty.
Qorytyndysynda grek tarapy qazaqstandyq áriptesterin eki el arasynda ornatylǵan dıplomatııalyq qarym-qatynastardyń mereıtoıymen quttyqtaı otyra, áriptesteriniń parlamentaralyq yntymaqtastyqty kúsheıtýge baǵyttalǵan is-sharalarǵa qatysý maqsatymen Astanaǵa shaqyrýlaryn iltıpatpen qabyldady.
