QR Mádenıet jáne sport mınıstrligine qarasty 4 joǵary oqý ornyna bıyl 888 bilim granty bólinedi

ASTANA. QazAqparat - «QR Mádenıet jáne sport mınıstrligine qarasty 4 joǵary oqý ornyna jalpy alǵanda 888 memlekettik bilim berý tapsyrysy qarastyrylyp jatqanyn atap ótý kerek. Munan bólek, magıstratýraǵa 131, doktorantýraǵa 10 oryn bólinbek». Bul týraly búgin QR Mádenıet jáne sport mınıstrliginiń kásiptik-tehnıkalyq kadrlardy daıarlaý jónindegi salalyq keńesi barysynda vedomstvoǵa qarasty Bilim, ǵylymı jumystar jáne halyqaralyq yntymaqtastyq departamentiniń dırektory Dinıslam Bolathanuly málim etti.

Sonymen qatar departament basshysy oqý oryndaryna qabyldaý barysynda mamandyqtardyń ózine tán erekshelikteri eskeriletindigin basa aıtty.

«Biraq, belgilengen zańnamalyq talaptardy oryndaýǵa mindettimiz. Osy oraıda barlyq joǵary oqý oryndarynyń, kásiptik-tehnıkalyq oqý oryndarynyń, mektep basshylyqtarynyń, qabyldaý komıssııalary jaýapty hatshylarynyń kelesi máselelerge kóńil bólýlerin suraımyz. Eń aldymen joǵary bilim berýdiń kásiptik oqý baǵdarlamalaryn iske asyratyn bilim berý uıymdary oqýǵa qabyldaýdyń qaǵıdalaryna nazar aýdarsańyzdar. Sonda talapkerlerdi qabyldaýǵa belgilgengen kúnderge oraı 13-25-shi tamyz aralyǵynda buıryq shyǵarylýy tıis», - dedi ol.