QR Mádenıet jáne sport mınıstrliginde jańa komıtet qurylady
ASTANA. QazAqparat - QR Mádenıet jáne sport mınıstrligi janynda Týrızm ındýstrııasy komıteti qurylady. Bul týraly Facebook-tegi paraqshasynda QR IDM Týrızm ındýstrııasy departamentiniń dırektory Marat Iǵalı málim etti, dep habarlaıdy QazAqparat.
«2017 jyldyń 1 aqpanynda QR Mádenıet jáne sport mınıstrliginde vedomstvo basshysy Arystanbek Muhamedıulynyń tóraǵalyǵymen týrızm salasyn damytýǵa baılanysty keńes ótti. Mınıstr Úkimet týrızm boıynsha ókiletti organnyń mártebesin kóterý men nyǵaıtý turǵysynda sheshim qabyldaǵanyn aıtty. Jaqyn arada Mádenıet jáne sport mınıstrligi janynda Týrızm ındýstrııasy komıteti qurylatyn bolady»,-dep jazdy Iǵalı.
Keńes barysynda 2020 jylǵa deıingi Qazaqstan Respýblıkasynyń Týrızmdi damytý tujyrymdamasynyń jobasy tanystyrylǵan. Klasterlik baǵdarlamaǵa elimizde alty klaster qamtylǵan: Astana qalasy («Eýrazııa júregi»), Almaty qalasy («Erkin mádenı aımaq»), Aqmola oblysy («Tabıǵıt pen kóshpeli mádenıettiń tutastyǵy»), Shyǵys Qazaqstan oblysy («Altaı injýi»), Ońtústik Qazaqstan oblysy («Jibek jolynyń jandanýy»), Mańǵystaý oblysy («Kendirli» Kaspıı qaqpasy).
Jıyn barysynda A. Muhamedıuly otandyq týrıstik qaýymdastyqtardy 2020 jylǵa deıingi Qazaqstan Respýblıkasynyń Týrızmdi damytý tujyrymdamasynyń jańarýyna belsendi túrde qatysýǵa shaqyrdy.
«Qazirgi kezde atalǵan tujyrymdamany jańartý boıynsha jumys júrip jatyr. Nıet bildirgender ózderiniń usynystaryn s.kulsharipov@mid.gov.kz elektrondy poshtasyna baǵyttaı alady»,-dep jazdy M. Iǵalı.
