QR Mádenıet jáne sport mınıstrligi men «Pervyı kanal» yntymaqtastyq jóninde kelisim jasady
MÁSKEÝ. QazAqparat - QR Mádenıet jáne sport mınıstrligi men «Pervyı kanal» AQ kıno ındýstrııasyn jáne televıdenıe salasyn damytý boıynsha yntymaqtastyq jónindegi kelisim jasasty.
Qujatqa QR Mádenıet jáne sport mınıstri Arystanbek Muhamedıuly men «Pervyı kanal» AQ Bas dırektory Konstantın Ernst qol qoıdy, dep habarlaıdy «QazAqparat» HAA menshikti tilshisi.
Qazaqstandyq jýrnalısterge bergen suhbatynda K.Ernst, qol jetken yntymaqtastyq kelisim aıasyndaǵy alǵashqy joba - eki serıal ekendigin atap ótti.
«Reseı men Qazaqstan arasyndaǵy tereń dostyq qarym-qatynasty jalǵastyra otyryp, biz eki joba óndirisi boıynsha shart jasastyq. Birinshi serıal keńestik kınematografııanyń Almatyǵa evakýatsııasyna arnalǵan. Onda basty keıipkerler Sergeı Eızenshteın men ózge de asa kórnekti kınematografıster bolady. Al ekinshi joba - Astana mereıtoıy jónindegi óndiristik serıal», - dedi K.Ernst.
Óz kezeginde QR Mádenıet jáne sport mınıstri A.Muhamedıuly, «eki jaqqa da perspektıvaly jáne qyzyqty kelisimge qol jetkizildi»- dep atap ótti.
«Ekinshi dúnıejúzilik soǵys kezeńinde Keńes odaǵynyń irgeli kınostýdııasynyń Almatyǵa kóshirilýine, Almatyda ańyzǵa aınalǵan birikken ortalyq kınostýdııanyń paıda bolýy tarıhyna arnalǵan bul jobanyń tanymal bolatyndyǵyna senemin. Kınoónerin damytýǵa belsendi qatysqan Sergeı Eızenshteın, Májıt Begalın jáne ózge de bizdiń metrlerdiń shyǵarmashylyǵy laıyqty da qyzyqty kórsetilýi tıis», - dedi A.Muhamedıuly.
Sondaı-aq, mınıstr Qazaqstan elordasynyń 20 jyldyq mereıtoıyna arnalǵan ekinshi serıaldyń sıýjetterine baılanysty da aıta ketti.
«Bul jaqsy melodrama bolady. Mysaly, bir otbasynyń Tselınogradtyń zamanaýı jáne tamasha elorda - Astanaǵa aınalýy jaıynda áńgimeleýi», - degen pikirimen bólisti mınıstr.
Sondaı-aq ol eki jobanyń da kınoprokat jáne «Pervyı kanal» efıri arqyly keń aýdıtorııaǵa arnalatyndyǵyn jetkizdi.
