QR Mádenıet jáne sport mınıstri Túrkistanǵa keldi
TÚRKІSTAN. QazAqparat - Búgin QR Mádenıet jáne sport mınıstri Arystanbek Muhamedıuly Túrkistan qalasyna arnaıy kelip, arheologtar jáne tarıhshylarmen kezdesti.
«Áziret Sultan» memlekettik tarıhı-mádenı jáne «Otyrar» memlekettik arheologııalyq qoryq-mýzeıin aralap kórdi, dep habarlaıdy QazAqparat tilshisi.
Mınıstr sondaı-aq «Qazqaıtajańǵyrtý» RMK-sy men «Bazız-A» qurylys kompanııasynyń jumystarymen tanysty.
Aıta keteıik, búginde «Uly dalanyń jeti qyry» baǵdarlamalyq maqalasy men qalany túrki dúnıesiniń rýhanı astanasy retinde tanytý jáne tarıhı oryndardyń tól kelbetin saqtaı otyryp, jandandyrý maqsatynda qalpyna keltirý jumystary júrgizilýde.
Mádenıet jáne sport mınıstrligi tarapynan qolǵa alynǵan joba boıynsha Túrkistan qalasyndaǵy 88,7 gektar aýmaqta ornalasqan orta ǵasyrdaǵy tarıhı-mádenı mura obektileriniń tarıhı kelbeti qaıta jóndelmek. Al, aǵymdaǵy jyldan bastap «Áziret Sultan» memlekettik tarıhı-mádenı qoryq-mýzeıine qarasty «Han meshiti», «Han ordasy», Kúltóbe qalashyǵy men «Jeti ata», «Darbaza», «Músálla», «Tákııa» qaqpalarynda qaıta jańǵyrtý jumystary bastalmaq.
Osy rette mınıstr Arystanbek Muhamedıuly tarıhı oryndar men aldaǵy ýaqytta atqarylar jumystar boıynsha pikir almasyp, birqatar tapsyrmalar júktedi.
