QR Mádenıet mınıstrligi «Óz elim» baıqaýyn ótkizedi
ASTANA. 20 shilde. QazAqparat - Otandyq sýretshilerge qoldaý kórsetý, olardyń jańa shyǵarmalaryn yntalandyrý maqsatynda QR Mádenıet mınıstrligi keskindeme, músin, grafıka, sándik-qoldanbaly óner atalymdary boıynsha «Óz elim» baıqaýynyń ótkiziletinin habarlaıdy.
Konkýrsqa kásibı sýretshiler bir nemese birneshe atalym boıynsha qatysa alady. Avtor ár atalymǵa bir ǵana shyǵarmasyn usynady. Konkýrsqa qatysýshylardyń jas shamasyna shek qoıylmaıdy.
Qatysýshylar konkýrstyń birinshi týrynda 2011 jyldyń 20 qyrkúıegine deıin baıqaýǵa qatysý týraly ótinishti, tólqujat nemese jeke kýáliginiń kóshirmesin jáne konkýrsqa usynatyn shyǵarmalarynyń elektrondy JPEG formatyndaǵy sýretterin uıymdastyrýshy komıtettiń elektrondy adresine (ruxdk@mail.ru ) jiberýi tıis. Birinshi týrdan ótken shyǵarmalardyń túpnusqalary qazan aıyna deıin QR Sýretshiler odaǵynyń kórme zalyna tapsyrylady.
Úzdik dep tanylǵan jumystar Astana qalasyndaǵy Prezıdenttik mádenıet ortalyǵyndaǵy kórmege qoıylady jáne Á. Qasteev atyndaǵy memlekettik óner murajaıynyń qoryna saqtaýǵa alynady.
Túrli atalymdar boıynsha jeńimpaz atanǵan shyǵarmalardyń avtorlary aqshalaı syılyqtarǵa, dıplomdarǵa ıe bolmaq.
Konkýrs týraly tolyq aqparat pen týrlardyń qorytyndysy týraly habarlar Qazaqstan Respýblıkasy Mádenıet mınıstrliginiń (www.mki.gov.kz ) jáne «Qazaqstan halqynyń rýhanı damý qory» AQ (www.ruhdk.kz ) resmı saıttarynda jarııalanady.
