QR Mádenıet mınıstri: Jazýshylar odaǵyn Almatyda jaýyp, Astanaǵa kóshirgen durys emes

ASTANA. QazAqparat - Jazýshylar odaǵyn Almatyda jaýyp, Astanaǵa kóshirgen durys emes. Bul týraly búgin Ortalyq kommýnıkatsııalar qyzmetindegi brıfıngte QR Mádenıet mınıstri Arystanbek Muhamedıuly málim etti.

«Jazýshylar odaǵyn Almatydan Astanaǵa kóshirý jospary bar ma?» degen saýalǵa mınıstr: «Qazirgi ýaqytta mindetti túrde shyǵarmashylyq ortalyqtardy nemese ujymdardy basqa óńirlerden Astana qalasyna kóshirý kerek degen naqty ustanym joq. Eń durysy - biz Astanadan jańadan salýymyz kerek. ıAǵnı, ózge aımaqtardan búkil ujymdardy jaýyp, tek qana elordada ashý durys emes», - dep jaýap qaıtardy.

Vedomstvo basshysynyń paıymynsha, óńirlerdegi jetistikter sol jerlerde qalýy kerek. Kerisinshe, aımaqtardaǵy ortalyqtardy damytýǵa qoldaý jasaý qajet.

«Jazýshylar odaǵynyń Almatyda óziniń shyǵarmashylyq ortasy bar. Ony qazirgi kezde jaýyp, Astanaǵa kóshirgen ol da durys emes. Biraq keleshekte de sondaı shyǵarmashylyq ortalyqtardy mindetti túrde Astana qalasynda salyp, ashýymyz kerek. Bizdiń maqsatymyz - mádenıetti tek qana bir óńirde shoǵyrlandyrý emes, mádenı qundylyqtardy keńinen barlyq óńirde birdeı taratý», - dep túıdi mınıstr.