QR ІІM Ulttyq ulany Áskerı keńesiniń 9 aıdaǵy jumysy qorytyndylandy
ASTANA. KAZINFORM - Ulttyq ulan áskerin basqarý ortalyǵynda QR Іshki ister mınıstriniń orynbasary – Ulttyq ulan Bas qolbasshysy general-maıor Ańsaǵan Baltabekovtyń tóraǵalyǵymen Áskerı keńesi ótti.
QR ІІM Ulttyq ulanynyń baspasóz qyzmetiniń habarlaýynsha, jıynǵa Áskerı keńes músheleri, óńirlik qolbasshylyqtardyń qolbasshylary, Ulttyq ulan akademııasynyń bastyǵy, bas basqarmalar men basqarmalardyń, ortalyqtardyń, derbes bólimder men qyzmetterdiń bastyqtary, sondaı-aq Polıtsııa departamentteriniń bastyqtary qatysty.
Keńeske beınekonferentsııa rejıminde óńirlik qolbasshylyqtar men áskerı bólimderdiń basshylyq quramynyń ofıtserleri qosyldy.
Áskerı keńes otyrysynyń kún tártibinde 2024 jyldyń 9 aıyndaǵy Ulttyq ulannyń qyzmettik-jaýyngerlik is-áreketiniń qorytyndysy jáne aldaǵy kezeńge arnalǵan mindetter qaraldy.
Bas qolbasshynyń tárbıe jáne áleýmettik-quqyqtyq jumys jónindegi orynbasary general-maıor Qaırat Úmbetov «2024 jyldyń 9 aıyndaǵy áskerdiń qyzmettik-jaýyngerlik is-áreketiniń jaı-kúıi jáne aldaǵy kezeńge arnalǵan mindetter» týraly baıandama jasady.
Sodan keıin áskerı bólimder men bólimshelerde jaýyngerlik qyzmetti uıymdastyrý jónindegi isterdiń jaǵdaıy týraly óńirlik qolbasshylyqtar qolbasshylarynyń jáne QR ІІM Ulttyq ulan Akademııasy bastyǵynyń esepteri men problemalyq máseleleri tyńdaldy.
Budan ári «Sarbazdyq jáne serjanttyq quramdar laýazymdarynda kelisimshart qyzmetiniń áskerı qyzmetshilerin jasaqtaý jónindegi jumystyń nátıjeleri» týraly baıandamasynda Kadrlar jáne áskerı bilim basqarmasynyń bastyǵy general-maıor Nurbol Mirtaev kelisimshart boıynsha áskerı qyzmetshiler sanatyn jasaqtaý máselelerin qozǵady.
Qazaqstan Respýblıkasy Ulttyq ulanynyń Áskerı keńesi 9 aıdaǵy qyzmetiniń nátıjelerin zerdeleı kele, áskerdiń jedel-qyzmettik daıyndyǵy tıisti deńgeıde ekenin atap ótti.
Aıta ketý kerek, 2024 jyldyń ótken kezeńinde Ulttyq ulannyń áskerı bólimderi oblystar men qalalardyń Polıtsııa jáne Qylmystyq-atqarý júıesi departamentteriniń aýmaqtyq bólimshelerimen birlesip, jaýyngerlik qyzmettiń mindetterin tolyq kólemde oryndady.
Otyrysty qorytyndylaı kele, QR Іshki ister mınıstriniń orynbasary – Ulttyq ulan Bas qolbasshysy general-maıor Ańsaǵan Baltabekov ishki ister mınıstri polıtsııa general-leıtenanty Erjan Sádenovtiń mindetterin jetkizdi. Kúshter men quraldardyń turaqty daıyndyǵyn qamtamasyz etýge, óńirlerdegi jáne qorǵalatyn obektilerdegi qoǵamdyq-saıası ahýaldy qadaǵalaýǵa, kelisimshart boıynsha áskerı qyzmetshilerdiń laýazymdaryn jınaqtaý jónindegi jumysty júzege asyrýǵa, jeke quram arasynda zańdylyq pen quqyqtyq tártipti saqtaýǵa nazar aýdardy. Sondaı-aq, baǵynyshtylarmen jeke tárbıe jumysyn uıymdastyrýdy qatań baqylaýǵa alýdy tapsyrdy.
Budan bólek, áskerı qyzmetshiler arasynda ólim men jaraqattanýdyń aldyn alýǵa erekshe nazar aýdaryldy. Mundaı jaǵdaılarǵa beıbit ýaqytta jol berilmeıtini jáne barlyq shendi tulǵalar mundaı faktilerdi joıý úshin qajetti sharalardy qabyldaýy kerek ekendigin atap ótti.
— El Prezıdenti — Qarýly Kúshterdiń Joǵarǵy Bas Qolbasshysy Qasym-Jomart Kemeluly Toqaevtyń jas jigitter Otan aldyndaǵy boryshyn atqaratyn áskerde zań men tártipti saqtaý týraly talaby asa mańyzdy. «Sarbazdar Qarýly Kúshterde jáne basqa da kúsh qurylymdarynda óz mindetterin durys oryndaı alýy úshin, eń aldymen, temirdeı tártipti qamtamasyz etý qajet», dedi Memleket basshysy. Sondyqtan biz qaıǵyly saldarǵa ákelýi múmkin sátsizdikterge jol bermeýimiz kerek. Barlyq deńgeıdegi komandırler tártip tek zańdylyqty saqtaý ǵana emes, memleketimizdiń jaýyngerlik daıyndyǵy men qorǵanysynyń negizi ekenin túsinýi mańyzdy, – dedi ásker basshysy.
Aıta ketý kerek, Ulttyq ulan bólimsheleri bıylǵy 9 aıda ózara is-qımyl jasaıtyn organdarmen birlesip ShYU Sammıti men V Dúnıejúzilik kóshpendiler oıyndaryn ótkizý kezinde qoǵamdyq tártipti kúsheıtýge, izdestirý is-sharalaryna, sondaı-aq tabıǵı sıpattaǵy tótenshe jaǵdaı kezinde sý tasqynyna qarsy jáne izdestirý-qutqarý is-sharalaryna qatysty.
3 myńnan astam áskerı qyzmetshi, 160-tan astam avtomobıl jáne arnaıy tehnıka, 7 avıatsııa birligi tabıǵı sıpattaǵy tótenshe jaǵdaılar saldaryn joıýǵa tartyldy. 4 myńnan astam adam, 600 tonna júk jáne 130 tonna gýmanıtarlyq kómek tasymaldandy. 5 myńnan astam azamat evakýatsııalandy jáne jeke quram men tehnıkany aralas tásilmen tasymaldaý júzege asyryldy.
Aýmaqtyq polıtsııa jáne Ulttyq qaýipsizdik organdarynyń kúshtik qoldaýymen qylmystar men ákimshilik quqyq buzýshylyqtar jasaǵany úshin, onyń ishinde ІІM jáne UQK Ortalyq apparattarymen birlesip, 13 aýqymdy arnaıy operatsııa júrgizildi.
Áskerı keńes otyrysynyń qorytyndysy boıynsha basshylyq etý jáne oryndaý úshin óńirlik qolbasshylyqtar men áskerı bólimderge jiberiletin Qaýly qabyldandy.
