QR ІІM Ulttyq ulany akademııasynda jańa oqý kezeńi bastaldy
PETROPAVL. KAZINFORM — Petropavlda Qazaqstan Respýblıkasy ІІM Ulttyq ulany akademııasynyń bazasynda 2024-2025 jyldyń jańa oqý kezeńiniń bastalýyna arnalǵan saltanatty is-shara ótti. Bul týraly QR ІІM Ulttyq ulanynyń baspasóz qyzmeti málim etti.
Tańerteńgi ýaqytta saptyq alańda oqý ornynyń barlyq jeke quramy sapqa turǵyzyldy. Eń aldymen Akademııa bastyǵy polkovnık Artýr Tokýshev QR Ulttyq ulany Bas qolbasshysynyń orynbasary general-maıor Baýyrjan Ábjanovqa jeke quramnyń sharaǵa daıyn ekendigin baıandady. Odan keıin Qazaqstan Respýblıkasynyń Memlekettik Ánurany oryndalyp, qatysýshylarǵa Bilim kúnine oraı jáne jańa oqý kezeńiniń bastalýyna baılanysty Іshki ister mınıstriniń orynbasary-Ulttyq ulannyń Bas qolbasshysy general-leıtenant Erkin Botaqanovtyń quttyqtaý jedelhaty oqyldy.
General-maıor Baýrjan Ábjanov ofıtserler, kelisim shart boıynsha áskerı qyzmetshiler jáne kýrsanttar aldynda sóılegen sózinde Bilim kúni tek oqytýshylar men oqýshylardyń ǵana merekesi emes, sonymen qatar bilim berýdiń mańyzdylyǵyn atap ótýge arnalǵan mereke ekenin aıtty. Ol qazirgi Qazaqstan úshin erekshe mańyzǵa ıe ekenine toqtaldy.
— Kúz aıynyń alǵashqy kúni biz oqý ornymyzdyń tabaldyryǵyn alǵash attaǵan 1 kýrs kýrsanttary men magıstranttaryn erekshe saltanatty túrde qarsy alamyz. Olar úshin birinshi oqý jyly — eń mańyzdy sátterdiń biri. Olardyń bilim ordasynda alǵan qabileti men daǵdylary bolashaqtaǵy ofıtserlerdiń áskerı qyzmeti men taǵdyryna áser etedi, — dedi Baýrjan Sadyquly.
Bıyl Akademııaǵa 218 kýrsant oqýǵa tústi. Olardyń ishinde elimizdiń kez kelgen joǵary oqý ornynyń qabyrǵasynda tegin bilim alýǵa múmkindik beretin «Srochnık 2.0» baǵdarlamasynyń sertıfıkatyn ıelengen 13 kýrsant bar. Biraq olar Ulttyq ulan akademııasyn tańdaǵanyn atap ótýge bolady.
Sonymen qatar, 1-shi oqý batalonynyń kýrsanttary men 2-kýrs magıstranttary bıylǵy jyly oqý bitiredi. Sondyqtan olar úshin kúrdeli praktıkalyq sabaqtar, tájirıbeler jáne basqa da mańyzdy is-sharalar ótkizý josparlanǵan. Onyń qorytyndysy retinde memlekettik emtıhandar alynady.
General-maıor Baýrjan Ábjanov óz sózinde bilimge, ózin-ózi tárbıeleýge, óziniń tańdaǵan áskerı mamandyǵynyń negizderin túsinýge umtylǵan bolashaq ofıtserler mańyzdy maqsattar qoıýǵa jáne olarǵa qol jetkizýge múmkindik alatynyn atap ótti. Ol Akademııa kýrsanttary men magıstranttaryna bilim alý jolynda tabandylyq, al komandalyq jáne professorlyq-oqytýshy quramǵa jańa ıdeıalar men kásibı tabystar tiledi.
Sondaı-aq jańa oqý kezeńiniń ashylýynda Ulttyq ulan akademııasynyń ardageri otstavkadaǵy polkovnık Baqytjan Sembaev pen 4 kýrs kýrsanty qatardaǵy jaýynger Dıas Bedelbaı quttyqtaý sóz sóıledi.
Іs-shara barysynda Tildik daıyndyq kafedrasynyń oqytýshysy efreıtor Jadyra Shakırbaeva men Oqý protsesin qamtamasyz etý batalonynyń jóndeý vzvodynyń komandıri aǵa serjant Dáýren Júnisovke alǵashqy ofıtserlik pogondar tabystaldy. Jas ofıtserlerge Іshki ister mınıstriniń atynan «leıtenant» áskerı sheni bar pogondardy Ulttyq ulan Bas qolbasshysynyń orynbasary general-maıor Baýyrjan Ábjanov tabys etti.
Bilim kúnine jáne oqý kezeńiniń bastalýyna arnalǵan is-shara Akademııa jeke quramynyń saltanatty sherýimen aıaqtaldy. Sodan keıin olar oqý synyptaryna bardy. Al kelisim shart boıynsha ofıtserler men áskerı qyzmetshiler úshin birinshi sabaq memlekettik-quqyqtyq daıyndyq páninen bastalyp, olarǵa general-maıor Baýrjan Ábjanov el Prezıdenti — Qarýly Kúshterdiń Joǵarǵy Bas qolbasshysynyń, QR Іshki ishki ister mınıstri men Іshki ister mınıstriniń orynbasary — Ulttyq ulan Bas qolbasshysynyń talaptary aıasynda Ulttyq ulannyń negizgi mindetterin jetkizdi.
Aıta keteıik, jańa oqý kezeńiniń bastalýynyń ereksheligi Memleket basshysy Qasym-Jomart Toqaevtyń Qazaqstan halqyna Joldaýymen tuspa-tus keldi. Memleket basshysynyń tikeleı efırde kórsetilgen Joldaýyn Akademııanyń qolbasshylyǵy jáne oqý protsesin qamtamasyz etýge jaýapty ofıtserler men professorlyq-oqytýshylyq quram jınalys zalynda arnaıy ornatylǵan úlken led-ekrannan tyńdady. Budan bylaı olar Joldaýda aıtylǵan basym baǵyttardy kýrsanttarǵa jetkizip, Prezıdent tapsyrmasynyń oryndalýyna óz úlesterin qosady.
