QR ІІM kýrsanttary jappaı aýrýhanaǵa tústi
Іshki ister mınıstrliginiń Pavlodar oblysyndaǵy oqý mekemesiniń kýrsanttary Sultanov atyndaǵy oblystyq aýrýhanasyna tústi. Qoıylǵan dıagnoz – aýyrlyǵy ortasha dárejedegi juqpaly respıratorly vırýstyq ınfektsııa (JRVI), ótkir rınofarıngıt, dep habarlaıdy Kazinform.
Oblystyq Densaýlyq saqtaý basqarmasynan málim etkendeı, 29 qarashada QR ІІM Qylmystyq-atqarý júıesi komıteti ortalyǵynyń kýrsanty – 18 jastaǵy qyz aýrýhanaǵa jetkizildi. Taǵy 10 kýrsant 1 jeltoqsan kúni keshqurym túsken. Barlyǵynan analız alynyp, em-dom taǵaıyndalǵan.
«Olar halyqtyń dekrettelgen tobyna enýine baılanysty – kazarmada jatatyndyqtan aýrýhanaǵa jatqyzyldy. Qazir barlyǵynyń jaǵdaıy turaqty», – dep málim etti oblystyq Densaýlyq saqtaý basqarmasynyń baspasóz qyzmetinen.
Kýrsanttardyń eshqaısysy ázirge aýrýhanadan shyǵarylǵan joq.
