ІІM Astana meıramhanasyndaǵy kisi ólimi boıynsha Qýandyq Bıshimbaevtyń ustalǵanyn rastady

Іshki ister mınıstriniń orynbasary Sáken Sársenov Astana meıramhanasyndaǵy kisi ólimi boıynsha burynǵy Ulttyq ekonomıka mınıstri Qýandyq Bıshimbaevtyń ustalǵanyn rastady, dep habarlaıdy Kazinform agenttigi.

«Keshegi qaıǵyly oqıǵanyń mán-jaıy anyqtaldy ma? Burynǵy Ulttyq ekonomıka mınıstri Qýandyq Bıshimbaevtyń aty atalyp jatyr. Qoǵamdyq orynda kisi ólimine qalaı jol berilgen?», - dep surady jýrnalıst.

Mınıstrdiń orynbasary bul suraqqa qysqa jaýap qaıyrdy.

«Ol ustaldy, qazir tergeý sharalary ótip jatyr. Qalǵanyna pikir bildire almaımyn. Jumys aıasynda sizderge qosymsha málimet beriledi»,-dedi.

BAQ ókilderi ólimge jol bergen meıramhana qyzmetkerleriniń jaýapkershiligi týraly surady.

«Qazir osy ispen tergeý departamentiniń qyzmetkerleri aınalysyp jatyr. Meniń oıymsha, keıin olar habaryn beredi», - dedi Sáken Sársenov.