QR Qylmystyq kodeksi jańa nusqasynyń jobasynda bas bostandyǵynan aıyrýdyń balamasy retinde aıyppuldar men qoǵamdyq jumystarǵa tartý qarastyrylǵan
Bul týraly búgin Astanada ótken «Qazaqstan Respýblıkasynyń jańa qylmystyq zańnamasy: problemalary, tendentsııalary jáne jetildirý joldary» taqyrybyndaǵy halyqaralyq ǵylymı-praktıkalyq konferentsııada QR Bas prokýratýrasynyń basqarma bastyǵy Rýslan Toqtaǵulov málimdedi.
Onyń aıtýynsha, QR QK-niń jańa jobasynda jazalaý júıesinde jasalǵan qylmystar úshin taǵaıyndalatyn jazalar qarastyrylǵan. «Bul júıede biz aıyppuldy usaq zańbuzýshylyqtarǵa da, qylmystarǵa da ámbebap jaza túri retinde qoldanbaqpyz. Sonymen qosa, aıyppuldyń kólemin de belgileımiz», - dedi R. Toqtaǵulov.
Onyń aıtýynsha, bul tolyqtyrýlar usaq zańbuzýshylyqtar men qylmystarǵa bas bostandyǵynan aıyrýdan kóri, aıyppul salý arqyly sot tájirıbesin basqa arnaǵa burýǵa járdemdesedi.
Sondaı-aq, bul zań jobasynda jazanyń basqa jazamen aýystyrylýy qarastyrylǵan. «Usaq zańbuzýshylyqtarǵa 500 AEK, qylmystarǵa 500-den 10 myńǵa deıingi AEK kóleminde aıyppuldar salynady. Edáýir kóp kólemdegi aıyppuldar qylmyskerlerge bas bostandyǵynan aıyrǵanmen birdeı áser etedi», - dedi Bas prokýratýranyń mamany.
Onyń aıtýynsha, aıyppuldar ortasha eseppen 50-70 paıyzǵa deıin artady. «Aıyppuldardy almastyrýǵa eń qolaıly jaza retinde biz qoǵamdyq jumystarǵa tartýdy qarastyramyz. Eger aıyppul 1000 AEK-ke deıin qoıylsa, onda ony qoǵamdyq jumystarmen almastyrýǵa bolady», - dep atap ótti R. Toqtaǵulov.
Sondaı-aq, ol jańa zań jobasynda qoǵamdyq jumystarǵa tartý jazasy tek usaq zańbuzýshylyq kezinde ǵana qoldanylatynyn basa aıtty.
