QR qurylys salasynyń normatıvtik bazasyn reformalaý boıynsha tujyrymdama jobasy maquldandy
ASTANA. 17 qyrkúıek. QazAqparat - Búgin selektorlyq rejimdegi Úkimet otyrysynda Qazaqstan Respýblıkasynyń qurylys salasynyń normatıvtik bazasyn reformalaý boıynsha tujyrymdama jobasy maquldandy. Atalǵan qujat boıynsha Óńirlik damý vıtse-mınıstri Serik Nokın baıandama jasady.
«Memleket basshysynyń tapsyrmasyna sáıkes mınıstrlik qurylys salasynyń normatıvtik bazasyn reformalaý boıynsha tujyrymdamany ázirledi. Reforma negizine tehnıkalyq normalaýdyń uıǵarylǵan ádisinen progressıvti parametrlik ádiske ótý eskerilgen», - dedi S. Nokın.
Onyń aıasynda balama ádister men sheshimderdi qabyldaý, jobalaý jáne qurylys salýda jańa ǵylymı ázirlemelerdi, tehnıkalyq sheshimderdi, sondaı-aq ınnovatsııalardy engizýge múmkindikter jasalyp otyr.
Onyń aıtýynsha, tujyrymdamada normatıvtik bazany reformalaýǵa negizgi qaǵıdattar men jalpy ustanymdar qalyptastyrylǵan. Qazaqstannyń álemdik ekonomıkalyq júıesine ári qaraı yqpaldasýyn qamtamasyz etetin ozyq tehnıkalyq retteý júıesin qurý tujyrymdamanyń maqsaty bolyp tabylady.
«Bul úshin myna negizgi mindetterdi sheshý qajet: Qurylystaǵy ınnovatsııany keńinen paıdalaný úshin jaǵdaılardy jasaý, tehnıkalyq kedergilerdi joıý, jalpy qabyldanǵan halyqaralyq senimdilik ólshemderine jáne jobalaý ádisterine ótý, sondaı-aq qurylys zańnamasy, tehnıkalyq normalaý, standarttaý, sertıfıkattaý, memlekettik saralaý jáne baqylaý salasyndaǵy saıasatty jetildirý», - dedi S. Nokın.
Sóz sońynda ol tujyrymdamany iske asyrý tehnıkalyq retteý júıesindegi jańa tıimdi normatıvtik bazany qurýǵa múmkindik beretinin, ol joǵary qurylys mádenıetin damytý jáne salanyń básekelestikke qabilettiligin arttyrý úshin negiz bolatynyn atap ótti.
