QR Qorǵanys mınıstrliginiń jyljymaly úgit pýnkti erteń elordada óz jumysyn bastaıdy

ASTANA. 11 qyrkúıek. QazAqparat - Qazaqstan Respýblıkasy Qorǵanys mınıstrligi áskerı qyzmetti úgitteý jáne nasıhattaý jumystaryn jalǵastyrýda. Qarýly Kúshterdi zapastaǵy ofıtserlermen, serjanttarmen jáne qatardaǵy jaýyngerler quramymen jasaqtaý júıesin jetildirý - Qorǵanys mınıstrligindegi basty baǵyttardyń biri.

Bul týraly QR Qorǵanys mınıstrliginiń baspasóz qyzmetinen habarlady.

Mınıstrlik búgingi tańda Qarýly Kúshterdi sany emes sapasy jaǵynan myqty áskerı qyzmetshilermen jasaqtaýdy maqsat etip otyr. Bul kúnderi respýblıkanyń barlyq oblystary men iri qalalarynda jyljymaly beketter úgit nasıhat jumystaryn qyzý júrgizýde.

Jýyrda Astana qalasy Qorǵanys isteri jónindegi departamenti kezekti jyljymaly úgit-nasıhat pýnktin iske qosty. Kelisimshart boıynsha áskerı qyzmetke jınaý pýnkti halyq kóp jınalatyn «BIG Shanhaı» saýda ortalyǵynan oryn tepti. Munda departament qyzmetkerleri jurtshylyqpen kezdesip, azamattardy kelisimshart boıynsha áskerı qyzmet ótkerýge úndeıtin bolady.

Búginde Armııa týraly, áskerı qyzmettiń sharttaryn jurtshylyqqa túsindire alatyn Qarýly Kúshterdiń ókilderi halyqqa burynǵydan da jaqyndaı tústi.

Departament qyzmeterleriniń aıtýynsha, kelisimshart boıynsha áskerı qyzmetke nıet bildirýshiler sany artyp kele jatqan kórinedi.

2013 jylǵy 16 tamyzdan bastap jyljymaly úgit pýnktteri «Kerýen», «Han Shatyr» saýda oıyn-saýyq ortalyqtarynda jumys istegenin eske salamyz. Osy ýaqyt aralyǵynda 150-den astam jastar Qazaqstan Respýblıkasy Qarýly Kúshteri qatarynda qyzmet etýge nıet bildirse, olardyń ishinen 78 kandıdat tańdap alyndy. Aǵymdaǵy jylǵy 12 qyrkúıekten bastap jyljymaly úgit pýnkti Astana qalasyndaǵy Respýblıka dańǵylynda ornalasqan «Halyqqa qyzmet kórsetý ortalyǵy» RMK fılıalynda óz jumysyn jalǵastyratyn bolady.