QR Qorǵanys mınıstrliginiń jańa kadrlyq saıasaty - eki jyl ishinde kýrsanttan rota komandırine deıin. VIDEO
Bul týraly QR QM baspasóz qyzmetinen habarlandy.
Almatyda Qurlyq áskerleri áskerı ınstıtýtynyń bazasynda oqý ornyn 2011 jyly bitirgen úzdik jas komandırlerge qurmet kórsetý rásimi ótkizildi. Úzdik jumysy úshin jas ofıtserlerdi Qorǵanys mınıstri Ádilbek Jaqsybekovtiń ózi nagradtady.
QR QK Qurlyq áskerleriniń áskerı ınstıtýtyn bitirýshiler áskerı qyzmet baspaldaǵyn Qorǵanys mınıstrligi pılottyq jobasy - kadrlar saıasatyn jetildirý baǵdarlamasy aıasynda bastaǵan bolatyn. Jobany iske asyrý QR QK Qurlyq áskerleriniń bas qolbasshysy general-leıtenant Murat Maıkeevtiń basshylyǵymen júrgizildi. Baǵdarlama boıynsha oqytýshylar joǵary kýrstardyń ózinde kýrsanttardyń kóshbasshylyq qarym-qabiletteriniń qanshalyqty damyǵandyǵyn anyqtap, olardyń áleýetine sáıkes ári qaraıǵy qyzmet jolyna baǵyttaıdy.
Eksperımentke alǵashqy bolyp 2011 jyly bitirip shyqqan ofıtserler qatystyryldy. Olar bitirý kýrsynda birneshe topqa bólindi. Birinshi topqa kásiptik, moraldyq jáne psıhıkalyq deńgeıi joǵary kýrsanttar endi. Osy toptan shyqqan jas ofıtserler keıingi qyzmet jolynda basqalardan jyldamyraq ósti.
Joǵary oqý ornyn bitirgen jas ofıtserler QR QK Qurlyq áskerlerinde vzvod komandıri laýazymdaryna taǵaıyndalǵan bolatyn. Eki jyl ishinde osy leıtenanttardyń barlyǵyna derlik rota komandırilaýazymdaryna kóterildi. Olardyń tájirıbesi men joǵary nátıjesi osy baǵyttyń durystyǵyn dáleldedi.
«Jańa júıesiniń jumys isteıtinin ýaqyt kórsetti. Ol obektıvti ári transparentti jáne elimizdiń Qarýly Kúshterinde engiziletin bolady. Muny Sizder qyzmettegi tabystaryńyzben rastap kelesizder. Árıne bul Sizderdiń aldaryńyzda turǵan joldyń shaǵyn ǵana bóligi. Sizderdiń árqaısylaryńyz budan ári kásiptik jáne arnaýly daǵdylaryńyzdy arttyrý úshin jumysty jalǵastyrýlaryńyz qajet. Sizder osy jerdegi kýrsanttar úshin qalaı qyzmet etip, nege umtylý qajettigi jóninde úlgi kórsetesizder. Jáne de Elbasymyz - Qarýly Kúshterdiń Joǵarǵy Bas Qolbasshysy Nursultan Ábishuly Nazarbaev respýblıkamyz táýelsizdiginiń kúzetinde turǵan jas ofıtserlerdiń róline erekshe mán beretinin atap ótkim keledi», - dedi jas ofıtserler men QR QK Qurlyq áskerleri áskerı ınstıtýty kýrsanttary aldynda sóılegen QR Qorǵanys mınıstri Ádilbek Jaqsybekov.
«Bitirýshiler atynan kórsetilgen qamqorlyq pen kómek, Qorǵanys mınıstri men bas qolbasshy tarapynan kórsetilgen qoldaý úshin alǵysymyzdy bildirgim keledi. Bizge barlyq is-sharalar kómektesti, sondaı-aq ári qaraı qyzmette biz kez kelgen buıryqty oryndaýǵa ázirmiz», - dedi Qapshaǵaı qalasyndaǵy 35 desanttyq-shabýyl brıgadasy ekinshi desanttyq-shabýyldaý tobynyń komandıri gvardııa aǵa leıtenanty Almat Qalıev.
QR QK Qurlyq áskerleriniń bas qolbasshysy general-leıtenant Murat Maıkeev: «Árbir jas ofıtserdiń ózi joǵary mádenıet pen kásibıliktiń úlgisi bolyp qana qoımaı, osyny óz qaramaǵyndaǵylardan da talap etýi erekshe aıryqsha mańyzdy. Barlyq jaǵdaıda, ásirese baǵynysyndaǵylardyń is-áreketin baǵalaý kezinde salmaqtylyq tanytyp, asyǵys sheshim qabyldamaýǵa umtylýy tıis. Osy jaǵdaıda bólimshelerde jaǵymdy jaǵdaı qalyptasatyn bolady. Bul óz kezeginde joǵary jaýyngerlik daıarlyq pen áskerı tártiptiń joǵary nátıjelerine qol jetkizýge múmkindik beredi», - dep atap ótti.
Qorǵanys mınıstrligi ári qaraı da olardyń qyzmetin baqylap otyratyn bolady. Qazaqstan Qorǵanys mınıstrligi óziniń kadrlyq saıasatynda armııany biliktiligi joǵary mamandarmen jasaqtaýǵa basa nazar aýdaratyn bolady.