QR Qorǵanys mınıstrliginiń Kadet korpýsyna irikteý jalǵasyp jatyr
Jyl saıyn oqýǵa 1 500 jas qazaqstandyq qujattaryn tapsyratynyn eskere otyryp, nıet bildirýshilerge birqatar talaptarǵa saı bolý úshin mańyzdy baıqaýdan ótýge týra keledi. Birinshiden, úmitkerlerdiń jasy. Budan buryn áskerı qyzmet ótkermegen bozbalalar Kadet korpýsyna 17-21 jas aralyǵynda oqýǵa túse alady. Áskerı qyzmet ótkergen nemese qazirgi ýaqytta merzimdi áskerı qyzmettegi azamattardyń oqýǵa túsý jasy 24 jasqa deıin, al qazirgi kezde QR QK-de kelisimshart boıynsha qyzmet atqaryp júrgenderdiń jasy 25-ke deıin shekteldi. Odan basqa, bolashaq kadetterdiń densaýlyǵy myqty jáne úlgerimi 3,5-ten tómen emes ortasha bally bar bilimi týraly qujaty bolýy tıis. Bul rette UBT sertıfıkaty men keshendi testileýdiń nátıjesi qajet emes. Naǵyz kadet bolmas buryn bozbalalarǵa irikteýdiń birneshe kezeńderinen ótý qajet. Eń aldymen aldyn ala medıtsınalyq kýálandyrý. Ony talapkerler ótinish bergen jeri boıynsha ótedi. Ári qaraı aldyn ala kásiptik-psıhologııalyq irikteý, dene daıarlyǵyn tekserý, sońǵy medıtsınalyq kýálandyrý jáne kásiptik-psıhologııalyq irikteý. Al eń sońynda konkýrstyq irikteý jáne oqýǵa qabyldaý. Barlyq osy kezeńderdi bozbalalar 20 shildeden bastap tamyzdyń birinshi jartysyna deıin Kadet korpýsynda ótedi. Bul rette qoldanystaǵy áskerı qyzmetshiler, azamattyq balalar men áskerı mektep túlekteriniń kezeńderdi ótý merzimi erekshelenedi.
Sh. Ýálıhanov atyndaǵy QR QM Kadet korpýsy búgingi tańda kishi komandalyq quramdaǵy áskerı kadrlardy daıyndaýdy júzege asyratyn Qazaqstandaǵy birden-bir oqý orny. Oqý orny motoatqysh, tankti, áýe-desanttyq áskerler mamandyqtary boıynsha kadrlardy daıyndaıdy. Jalpy oqytý merzimi 1 jyl 10 aıdy quraıdy. Bul ýaqyt ishinde kadetter áskerı ǵylymdy teorııa júzinde jáne QR QK áskerı bólimderinde is júzinde meńgeredi. Oqý aıaqtalysymen barlyq kadetter QR QK-niń áskerı bólimderine bólinedi. Árqaısysymen 10 jyldyq merzimge kelisimshart jasalady. Bıylǵy jyly Kadet korpýsy 185 kadetti túletip ushyrdy. Bilim oshaǵy qurylǵan sátten bastap 20 jyl ishinde oqý orny áskerlerde qyzmet atqaryp júrgen 2 500-den asa serjantty daıyndap shyǵardy, dep habarlaıdy QR Qorǵanys mınıstrliginiń baspasóz qyzmeti.
