QR Qorǵanys mınıstrliginiń Kadet korpýsyn 2200-den astam serjant bitirdi (FOTO)
Búgingi tańda kadettik áskerı qyzmetshiler túrli bólimder men bólimshelerde Qarýly Kúshterdiń bas serjantynan bastap bólimshe komandırlerine deıingi laýazymdarda áskerı qyzmetterin laıyqty atqaryp júr. Jýyrda áskerı oqý ornynda jańa irikteý bastalady. Kadet korpýsynda oqýǵa 17 men 21 jas aralyǵyndaǵy jas azamattar, sondaı-aq 23 jastan aspaǵan kelisimshart boıynsha jáne merzimdi áskerı qyzmettegi áskerı qyzmetshiler qabyldanady. Oqý baǵdarlamasy bir jyl on aı merzimge eseptelgen. Kadetter birinshi kýrsta ózderine aldaǵy qyzmette qajetti áskerı istiń mańyzyn zerdeleıdi, áskerı ant qabyldap, 10 jyl merzimge kelisimshart jasasady. Ekinshi kýrsta áskerı taǵylymdamadan ótýge kirisedi. Olar QR QK áskerı bólimderine jiberilip, ol jerlerde alǵan teorııalyq bilimderin is júzinde tıimdi qoldanýǵa úırenedi, daǵdylar men tájirıbe jınaqtaıdy. Kadetter oqý aıaqtalysymen «basqarý» mamandyǵy boıynsha dıplom alady, sonymen qatar «Áskerı basqarýdyń (menedjer) kishi mamany» biliktiligi, «3-synypty BMP júrgizýshi mehanıgi» jáne «V», «S» sanatyndaǵy avtokólik júrgizýshisi kýálikteri beriledi. Kadet korpýsy bilikti áskerı kadrlar daıarlaıtyn oqý orny retinde qalyptasqanyna qaramastan áli de damý, jetilý ústinde. Ótken jyly qosymsha oqý tsıklderi qurylyp, serjanttar quramynyń bólim jáne qyzmet serjanty, oqytýshy serjant sııaqty jańa laýazymdary engizildi.