QR Qorǵanys mınıstrliginiń 2 mlrd teńge jymqyrǵan qyzmetkerlerine úkim shyqty
ASTANA. QazAqparat - Qylmystyq ister jónindegi mamandandyrylǵan aýdanaralyq áskerı soty Qazaqstan Respýblıkasy Qorǵanys mınıstrliginiń laýazymdy qyzmetkerlerine qatysty qylmystyq isti qaraýyn aıaqtady.
Bul týraly QR Áskerı sotynyń baspasóz qyzmeti habarlady.
Sottalǵandar Qazaqstan Respýblıkasy Qarýly Kúshteriniń áskerılerdi páterlerge ornalastyrý Bas basqarmasynyń jáne Qazaqstan Respýblıkasy Qorǵanys mınıstrliginiń bıýdjettik josparlaý jáne qarjy departamentiniń ofıtserleri arasynan, sondaı-aq jeke kásipker quramyndaǵy uıymdasqan qylmystyq top qurǵanyna kináli dep tanyldy. Atalǵan tulǵalar 2 mıllıard teńge kólemindegi iri mólsherde bıýdjet qarajatyn jymqyrǵan.
Atalǵan qylmystyq is boıynsha 11 tulǵa sottalyp, uıymdasqan top jetekshileri 11-den 13 jylǵa deıingi uzaq merzimderge bas bostandyǵynan aıyrý jazasy taǵaıyndaldy. Toptyń qalǵan músheleri 7 - 11 jylǵa deıingi merzimge bas bostandyqtarynan aıyryldy.
Memleketke keltirilgen zııan sottalǵandardan óndirildi. Sotpen sottalǵandardyń qylmystyq jolmen tabylǵan ne qylmystyq jolmen tabylǵan qarajatqa satyp alynǵan múlikteri, ıaǵnı Astana jáne Almaty qalalaryndaǵy elıtalyq turǵyn úılerdegi páterler, avtoturaqtar, qurylys úı-jaılary jáne keńse úı-jaılary, sondaı-aq qymbat baǵaly avtokólikter men sottalǵandardyń turǵylyqty meken-jaılarynan alynǵan aqshalaı qarajattar memlekettiń menshigine tárkilendi.
Úkim zańdy kúshine engen joq.
