QR Qorǵanys mınıstrliginde kúzgi áskerge shaqyrý jumystarynyń qorytyndylary shyǵaryldy

ASTANA. 21 qyrkúıek. QazAqparat - Búgin Qazaqstan Respýblıkasynyń Qorǵanys mınıstrliginde Qorǵanys vedomstvosynyń basshysy Ádilbek Jaqsybekovtiń tóraǵalyǵymen jumyldyrý jıyndaryn qorytyndylaǵan, sondaı-aq kúzgi áskerge shaqyrý tapsyrmalaryna arnalǵan keńeıtilgen májilis bolyp ótti, dep habarlady mınıstrliktiń baspasóz qyzmeti.

Keńeıtilgen keńeske Qazaqstan Qarýly Kúshteriniń basshylyq quramy jáne Qorǵanys isteri jónindegi departament bastyqtary men olardyń orynbasarlary qatysty.

Jıynnyń kún tártibinde kúzgi áskerge shaqyrý naýqanyna qatysty máseleler talqylanyp, aǵymdaǵy jylǵy tamyz aıynda ótkizilgen jumyldyrý jıyndarynyń qortyndysy shyǵaryldy.

- Áskerge shaqyrylýshylardy sapaly iriktep, olardy Qarýly Kúshterdiń qataryna shaqyrý Qazaqstan armııasynyń jaýyngerlik daıyndyq deńgeıin qamtamasyz etedi, - dep atap ótti Qorǵanys mınıstri Ádilbek Jaqsybekov. - Shaqyrý jáne medıtsınalyq komıssııalarynyń jumystarynyń jaqsarýy áskerge shaqyrylýshylardyń áskerı bólimderden qaıtyp kelý sanyn aıtarlyqtaı tómendetti.

Búginde áskerlerdegi jas jaýyngerler kontıngenti jaman emes. Sapalyq quramy aıtarlyqtaı ózgerdi. Sondaı-aq, shaqyrylýshylardyń bilim deńgeıi de artyp otyr. Aǵymdaǵy jyly azamattardy áskerge shaqyrý kórsetkishi boıynsha joǵary jáne arnaýly orta bilimi bar jastardyń sany jalpy shaqyrylýshylardyń úlken paıyzyn qurady. Sonymen qatar, áskerı-tehnıkalyq mektepterde oqyǵan jastardyń sany da jyl saıyn artyp keledi.

Qorǵanys mınıstri bıylǵy jyly Qazaqstan tarıhynda shaqyrý máselelerin pysyqtaǵan shynaıy úshkúndik jumyldyrý jıyndary ótkizilgenin jáne bul is-sharanyń óz kózdegen maqsatyna jetkenin atap ótti.

Shara sońynda Qarýly Kúshterdi jas shaqyrylýshylarmen jasaqtaý qyzmetin oryndaý boıynsha jumystardy odan ári jetildirýdiń tyń joldaryn izdestirýdi jalǵastyra berý qajettigi aıtyldy.