QR Qorǵanys mınıstrliginde Kaspııdegi qaıǵyly oqıǵanyń sebep-saldary aıtyldy (FOTO)

ASTANA. QazAqparat - Búgin Qazaqstan Respýblıkasynyń Qorǵanys mınıstrliginde alqa májilisi ótti, oǵan mınıstrliktiń basshylary, departamentter men basqarmalardyń basshylary, ásker túrleriniń bas qolbasshylary, ásker tekteri, óńirlik qolbasshylyq áskerleriniń qolbasshylary, áskerı joǵary oqý oryndarynyń, qorǵanys isteri jónindegi departamentteriniń bastyqtary, serjanttar quramy qatysty.

Alqa májilisinde QR Qorǵanys mınıstriniń jeke tapsyrmasy boıynsha QR QM Bas ınspektsııasy júrgizgen Aqtaýdaǵy qaıǵyly oqıǵany tekserý qorytyndysy boıynsha sóz qozǵaldy.

QR QM Bas ınspektsııasynyń basshysy general-leıtenant Qurban Qarajanovtyń baıandamasynda oqıǵanyń barlyq derekteri egjeı-tegjeıli túsindirildi. Taldaý kórsetkendeı, belgilengen erejelerdi jáne is-qımyl algorıtmderin saqtamaý negizinde keıbir jaǵdaılarda bazalyq negizderdi bilmeý jáne jeke quramnyń oqytylmaýy, sondaı-aq nashar baqylaýdyń saldarynan ákep soqtyratyn dúrlikpe adamı faktor birinshi sebep bolyp tabylady.

Sondaı-aq kelisimshart boıynsha áskerı qyzmetshilerdi sapaly túrde irikteý jáne osy sanatpen komandırler men tárbıeshilerdiń jumysy jónindegi kókeıkesti máseleler de nazardan tys qalǵan joq.

Qarýly Kúshterdi jasaqtaýdyń kelisimsharttyq júıesi Qazaqstanda 2002 jyldan bastap kezeń-kezeńmen engizilgenin túsiný qajet. Kelisimshart jáne merzimdi qyzmet boıynsha áskerı qyzmetshilerdiń arasalmaǵy birtindep azaıyp keledi jáne qazir shamamen 20%-ǵa 80%-dy quraıdy. Sonymen birge, osy kezeńde kelisimshart boıynsha qyzmettiń shaqyrylymnyń úılesýi elimizdiń áskerı qaýipsizdigin qamtamasyz etý úshin anaǵurlym utymdy jáne qolaıly bolyp tabylady.

Mundaı kózqaras bizge bir jaǵynan kelisimshart boıynsha áskerı qyzmetshiler tapsyrmalardy oryndaýǵa dereý kirisýge qabiletti jáne udaıy ázirliktegi quramalar men áskerı bólimderge ıe bolýǵa múmkindik beredi. Al basqa jaǵynan áskerı-esepke alý mamandyqtary boıynsha daıyndyqtan ótip jatqan shaqyrylymnyń áskerı qyzmetshileri bar bólimsheler ári qaraı da jumyldyrý qoryn quraı alady.

Áskerı-patrıottyq tárbıe berýdi jetildirý jáne onyń ádisnamalyq, aqparattyq jáne uıymdastyrýshylyq quramdasy ýaqyt talabynan týyndap otyr.

«Kez kelgen máseleniń mán-jaıyna tolyq jaýapkershilikpen, qaǵıdattylyqpen jáne túsinýshilikpen qaraǵan kezde ǵana edáýir ózgeriske qol jetkizýge bolady. Barlyq komandırler men basshylardy osyǵan baǵyttaımyn jáne búgin qoıylǵan tapsyrmalardyń múltiksiz oryndalýyn talap etemin», - dedi alqa májilisin qorytyndylaı kele QR Qorǵanys mınıstri Imanǵalı Tasmaǵambetov.