QR Qorǵanys mınıstrligi áskerı qyzmetshilerdi turǵyn úımen qamtamasyz etýdiń jańa qurylymyn usyndy

ASTANA. QazAqparat - Búgingi kúni QR Qorǵanys mınıstrliginiń balansynda 19,7 myń páter bar. Áskerı qyzmetshilerdi turǵyn úımen qamtamasyz etýdiń qajettiligi elimizdiń barlyq óńirlerinde jalpy kólemi 1 119 myń sharshy metr 20,5 myń páterdi quraıdy. Olardyń ishinde Astana, Almaty qalalary úshin qajetti turǵyn úıdiń jalpy kólemi 509,4 myń sharshy metr 9,4 myń páterdi qurap otyr, dep habarlaıdy QR QM baspasóz qyzmeti.

Qazirgi ýaqytta áskerı qyzmetshilerge jyl saıyn turǵyn úıdi jalǵa alǵany úshin kompensatsııa tólenedi. Osy maqsatta respýblıkalyq bıýdjetten jylda qarajat bólinedi. Bul qarajat jyldan jylǵa artyp keledi. Aıta ketsek, Qazaqstan Respýblıkasynyń Qorǵanys mınıstrligi áskerı qyzmetshilerge turǵyn úıdi jalǵa alǵany úshin 2014 jyly 12,3 mlrd. teńge tólese, al 2015 jáne 2016 jyldary 16,7 jáne 22,8 mlrd. teńge tóleýi kerek. Osylaısha, úsh jyl ishinde qaıtarýsyz 50 mlrd. teńge jaratyldy.

Atalǵan norma engizilgen sátten bastap kelisimshart boıynsha áskerı qyzmetshiler bıýdjettik qarajat esebinen jeke jalǵa berýshilerden turǵyn úıdi jalǵa alyp turady. Sonymen qatar, memleket te, áskerı qyzmetshi de ketken shyǵyndardyń ornyna jeke menshik páter ala almaıdy. Demek, áskerı qyzmetshilerge turǵyn úıdi jalǵa alý úshin tólenetin kompensatsııa olardyń turǵyn úı máselesin tolyǵymen sheship bere almaıdy.

Atalǵan másele barlyq áskerı qyzmetshilerdi qamtamasyz etý úshin jetkilikti qyzmettik turǵyn úı qorynyń bolmaýynan oryn alyp otyr. Kelisimshart boıynsha áskerı qyzmetshilerge derbes turǵyn úı qyzmettik turǵyn úı qoryn tolyqtyrý maqsatynda, tıisti jalǵa alý sharty boıynsha, ári qaraı satyp alý quqyǵymen qosa Qorǵanys mınıstrliginiń jeke menshiginen beriletin bolady.

Derbes jalǵa alynǵan turǵyn úı 2013 jyldyń 1 qańtarynan  bastap eńbek sińirgen jyly 10 jyldan kem nemese 2013 jyldan keıin áskerı qyzmetke alǵash kelip túsken Qarýly Kúshterdiń áskerı qyzmetshilerine beriletin bolady. Qorǵanys mınıstrliginiń derbes jalǵa alǵan úıi úshin jaldaý aqysyn tóleý áskerı qyzmetshiniń turǵyn úıdi jalǵa alý (jaldaý) úshin tólenetin kompensatsııasynda qarastyrylǵan qarajat esebinen tutas operatorǵa tóleý arqyly júrgiziledi.

Bul qurylym birte-birte engiziletin bolady. Áskerı qyzmetshini qyzmettik nemese derbes jalǵa alǵan turǵyn úımen qamtamasyz etý múmkindigi bolmaǵan jaǵdaıda áskerı qyzmettegilerge turǵyn úıdi jalǵa alǵany úshin kompensatsııa tóleýin toqtatpaıdy.