QR Qorǵanys mınıstrligi áskerı aerodromdardy jańǵyrtýda

Ótken ǵasyrdyń 70-jyldarynyń basynda paıdalanýǵa berilgen avıabazany tolyq qaıta qurylymdaý tuńǵysh ret júrgizilip otyr. Jańa ushý-qoný jolaǵyna arnaıy temirbetondy taqtalar tóseletin bolady. Olar artyq salmaqqa tózimdi ári qaýipsiz bolmaq. Sondaı-aq, ony paıdalaný merzimi de uzaratyn bolady. Jóndeý jumystary protsesinde jolaqtyń eni men uzyndyǵy da ulǵaıady.
«Qorǵanys mınıstri avıabazalardyń jaǵdaıyna barynsha kóńil aýdarýda jáne barlyq áskerı aerodromdarǵa jańǵyrtý júrgizý týraly tapsyrma qoıdy. Qosymsha jóndeý men eksplýatatsııany qajet etetin áskerı aerodromdardyń barlyq ushý-qoný jolaqtary avıatsııanyń zamanaýı talaptaryna saı qaıta óńdeýden ótýi kerek. Sebebi, bul áskerı aerodromdardyń ushý-qoný jolaǵyna ıstrebıtelder, shabýyldaýshy ushaqtar, bombylaýshy jáne kóptonnaly kóliktik ushaqtar qonady», - dep atap ótti general-maıor Baǵdat Maıkeev. Ol, sonymen qatar, jaýyngerlik ushaqtar men tikushaqtardyń udaıy ázirligin qamtamasyz etetin aerodrom joldarynyń sapaly qurylysynyń strategııalyq mańyzyn da atap ótti.
QR Qorǵanys mınıstriniń orynbasary QR QK Áskerlerdi páterlerge ornalastyrý bas basqarmasynyń bastyǵy polkovnık Ildar Gınıatýlınge qurylys jumystaryn aǵymdaǵy jyldyń aıaǵyna deıin aıaqtaýdy tapsyrdy. Júrgizilgen jumystardyń sapasyna kóńili tolatynyn jetkizdi.
Buǵan deıin habarlaǵanymyzdaı «Taldyqorǵan» aerodromy qaıta jóndeýden ótken soń Qazaqstan áskerı áýe kúshteri ásker teginiń jaýyngerlik qabileti men memlekettik avıatsııanyń ushý qaýipsizdigin arttyratyn jańa quraldarmen jaraqtanǵan zamanaýı aerodromǵa ıelik etetin bolady. Aerodromdar jelisin jóndeýge memleketten bólingen qarajat ushý qaýipsizdigi máselelerin nyǵaıtý máselelerindegi mańyzdy baǵyt bolyp tabylady.