QR Qorǵanys mınıstrligi 7-qysqy Azııa oıyndarynyń jeńimpazdaryn quttyqtady
ALMATY. 15 aqpan. QazAqparat /Erbol Turymbetov/ - QR Qorǵanys mınıstrligi Armııashylardyń ortalyq sport klýbyna qarasty Şýchedegi oqý-jattyǵý ortalyǵynda 7-qysqy Azııa oıyndarynyń jeńimpazdaryn ulyqtaýǵa arnalǵan is-shara ótkizdi.
Saltanatty jıynda chempıondardy Qorǵanys mınıstrligi basshylyǵynyń atynan oqý-jattyǵý ortalyǵynyń bastyǵy - bas jattyqtyrýshy, podpolkovnık Serik Dándibaev quttyqtady. «Keshegi Aq Azıada oıyndarynda armııashylar barlyǵy 23 medal utyp aldy. Onyń segizi altyn, segizi kúmis jáne jeteýi qola. Bul Ulttyq qurama utyp alǵan medalderdiń jalpy sanynyń 32,8 paıyzyn quraıdy. Al, bizdiń Ortalyqtyń áskerı qyzmetshileri ıelengen medal sany - 14. Onyń altaýy - altyn», - dedi podpolkovnık S.Dándibaev.
Aıta keteıik, Serik Dándibaev 7-qysqy Azııa oıyndaryna ulttyq sanattaǵy tóreshi retinde qatysqan edi.
Jeńimpaz armııashylardy quttyqtaýǵa Áskerı sport kolledjiniń ádiskeri, joǵary sanattaǵy ulttyq tóreshi V. Mılıdı de arnaıy qatysty. Osy kisiniń baptaýynda bolyp, ósip-jetilgen starshına Nıkolaı Chebatko, kishi serjanttar Marına Lebedeva jáne Evgenıı Velıchkolar 7-qysqy Azııa oıyndarynda chempıon atanyp, elimizdiń mereıin ósirdi.
