QR Qorǵanys mınıstriniń sheshimimen «Batys» óńirlik qolbasshylyǵynyń qolbasshysy qyzmetinen bosatyldy (FOTO)
ASTANA. QazAqparat - Aqtaýda oqý-jattyǵý kezinde áskerı qyzmetshilerdiń qaza bolý faktisi boıynsha Áskerı prokýratýra qylmystyq is qozǵady, dep habarlaıdy QR QM baspasóz qyzmeti.
Aldyn ala tekserý jáne tergeý qorytyndysy boıynsha Qorǵanys mınıstriniń sheshimimen polkovnık Murat Nuǵymanov qyzmetinen shettetilip, «Batys» óńirlik qolbasshylyǵynyń qolbasshysy qyzmetinen bosatyldy.
Sonymen qatar, «Batys» óńirlik qolbasshylyǵy qolbasshysynyń birinshi orynbasary - shtab bastyǵy Rızat Qolpashevti, «Batys» óńirlik qolbasshylyǵy qolbasshysynyń jaýyngerlik daıarlyq boıynsha orynbasary, polkovnık Mergen Qapashevti, teńiz jaıaý áskeri brıgadasynyń komandıri, podpolkovnık Erbolat Tolyqbaevty qyzmetinen bosatý týraly sheshim qabyldandy. Olardyń budan arǵy jaýapkershiligin áskerı prokýratýranyń tergeý sharalarynyń nátıjesi boıynsha sot organdary anyqtaıtyn bolady.
Vedomstva basshysy búgin Aqtaýǵa oqıǵa ornyna baryp, áskerı gospıtalda jatqan sarbazdardyń kóńilin surap, osyndaı qaýipti ári ekstremaldy jaǵdaıdaǵy utymdy áreketteri úshin alǵysyn aıtty jáne tez arada saýyǵyp ketýlerine tilektestigin bildirdi. Sondaı-aq, jan-jaqty medıtsınalyq tekserýmen qatar, psıhologııalyq kómek kórsetýdi tapsyrdy.
