Qazaqstan Respýblıkasy Qorǵanys mınıstrliginiń buıryǵy

2011 jylǵy 24 maýsym № 276 Astana qalasy

General S.Q. Nurmaǵambetov atyndaǵy «Jas ulan» respýblıkalyq mektebine qabyldaý qaǵıdasyn bekitý týraly

«Bilim týraly» Qazaqstan Respýblıkasynyń 2007 jylǵy 27 shildedegi Zańynyń 26-babyna jáne «General S.Q. Nurmaǵambetov atyndaǵy «Jas ulan» respýblıkalyq mektebi» memlekettik mekemesin qurý máseleleri» týraly Qazaqstan Respýblıkasy Úkimetiniń 1999 jylǵy 27 naýryzdaǵy №309 qaýlysyna sáıkes buıyramyn:

1. Qosa berilip otyrǵan General S.Q. Nurmaǵambetov atyndaǵy «Jas ulan» respýblıkalyq mektebine qabyldaý qaǵıdasy bekitilsin.

2. Qazaqstan Respýblıkasy Qorǵanys mınıstrligi Áskerı bilim jáne ǵylym departamentiniń bastyǵy:

1) 2013 jyldan bastap aýyspaly quramnyń shtat sanynyń lımıti sheginde konkýrspen 1 oqý ornyna 3 kandıdattan memlekettik tilde oqytylatyn synyptarǵa qabyldaýdy arttyrsyn;

2) zańnamada belgilengen tártippen osy buıryqty memlekettik tirkeý úshin Qazaqstan Respýblıkasynyń Ádilet mınıstrligine joldasyn;

3) memlekettik tirkeýden ótkizgennen keıin buıryqty resmı jarııalaý úshin buqaralyq aqparat quraldaryna joldasyn.

3. Buıryq alǵash resmı jarııalanǵan kúninen bastap qoldanysqa engiziledi.

4. Buıryqtyń oryndalýyn baqylaý Qazaqstan Respýblıkasy Qorǵanys mınıstriniń orynbasary Á.Q. Qurmanǵalıevqa júktelsin.

5. Buıryq laýazymdy adamdarǵa, olarǵa qatysty bóliginde jetkizilsin.

Á. JAQSYBEKOV.

Qazaqstan Respýblıkasynyń Bilim jáne ǵylym mınıstriniń minetin atqarýshy M. Orynhanovpen 2011 jylǵy 21 shildede kelisilgen.

QR Ádilet mınıstrliginde 2011 jylǵy 15 tamyzda №7124 sanmen tirkelgen.

Qabyldaý qaǵıdasy respýblıkalyq BAQ-ta jarııalandy.