QR Qorǵanys mınıstriniń Almaty jáne Taldyqorǵan áskerı garnızondaryna jasaǵan jumys sapary aıaqtaldy
Atalmysh vedomostvonyń baspasóz qyzmeti habarlaǵandaı, Qorǵanys mınıstri Taldyqorǵandaǵy desantshy-jaýyngerlerdiń ınfraqurylymymen tanysyp, merzimdi qyzmettegi áskerı qyzmetshilerdiń sekirý jumystaryna ázirlenip jatqan áýe-desantshylarymen júzdesti. Sondaı-aq ol kóktemde áskerge shaqyrylyp, budan bir apta buryn ant qabyldap, bólimniń áskerı platsynda daıyndalyp júrgen sarbazdarmen áńgimelesti.
Bul brıgadanyń TMD elderi sheńberinde úzdikter qatarynan tabylyp Jedel áreket etý ujymdyq kúshteriniń qataryna qosylǵanyn aıtyp ótken jón.
Qorǵanys mınıstri jumys sapary sheńberinde Shanhaı yntymaqtastyq uıymyna múshe memleketterdiń qarýly kúshteriniń jaqyn kúnderi Tájikstanda ótetin birlesken «Beıbit mıssııa-2012» antıterrorlyq jattyǵýyna qatysatyn desantshy-jaýyngerlermen kezdesip, olarǵa tabys tiledi.
Avıabazada Ádilbek Jaqsybekov jaýyngerlik kezekshilikte turǵan avıatsııalyq tehnıkalarmen tanysyp, áskerı aerodromnyń kúrdeli jóndeýin jeke óz baqylaýyna aldy.
Almaty garnızonynda qorǵanys vedomstvosynyń basshysy fýtboldan «TsSKA» men «Báıterek» komandalarynyń arasyndaǵy QR birinshiliginiń tusaýyn kesti. Bul Qazaqstan birinshiliginiń 1 lıgasyndaǵy ekinshi týr oıyny. Armııashylar bul oıynda astanalyq komandaǵa qarsy tura bildi. Oıyn QR QM AOSK Oqý-jattyǵý ortalyǵynyń kúrdeli jóndeý jasalǵan stadıonynda ótkizildi.
Bul sport arenasy armııalyq sporttyń 700 kórermeni men jankúıerin qabyldaı alady. Stadıonda fýtbol-regbı alańy jáne jeńil atletterge arnalǵan jol bar. Júgirý jolynyń uzyndyǵy 400 metrdi quraıdy.
