QR Qorǵanys mınıstri Jeńistiń 70 jyldyǵy paradyna daıyndyqty tekserdi

ASTANA. QazAqparat - Búgin QR Qorǵanys mınıstri Imanǵalı Tasmaǵambetov jumys babymen Astana janyndaǵy Qyrqynshy beketinde ornalasqan dalalyq lagerde boldy. Qazirgi ýaqytta bul lagerde Jeńistiń 70 jyldyǵyna oraı ótkiziletin paradqa qatysatyn úsh jarym myńnan astam áskerı qyzmetshi ornalasqan. Bul týraly QR Qorǵanys mınıstrliginiń baspasóz qyzmetinen habarlandy.

«Bul parad elimizde buryn ótkizilgen paradtarǵa qaraǵanda eń aýqymdy áskerı sherý bolady dep kútilýde. Paradqa jeke quramnan 5 myńnan asa sarbaz, 220-dan asa áskerı tehnıka, 85 ushý apparttary qatysady. Mazmundyq ıdeıasyna qaraı parad tarıhı jáne zamanaýı eki bólimdi quraıdy. Zamanaýı bólimde búgingi qazaqstandyq armııa qarý-jaraǵyn quraıtyn qarýlar men áskerı tehnıkanyń úlgileri kórsetiledi. Áskerı qyzmetshiler zamanaýı áskerı kıim úlgilerin kıedi», delingen vedomstvo málimetinde. Al tarıhı bólimde Uly Otan soǵysy jyldaryndaǵy tehnıkanyń 36 túri qatysady. Onyń ishinde 27 áskerı tehnıka men qarý-jaraq (tank T-34, ZıL-157, ZIS-2 zeńbiregi jáne M-30 gaýbıtsasy, tanymal BM-13 RS-30 «Katıýsha» jáne «Maksım» pýlemeti), sondaı-aq 9 ushý (AN-2 jáne TL-2000) apparaty bar. Aıta keteıik, ótken demalys kúnderi Astanaǵa áskerı tehnıka tıelgen sońǵy eshelon keldi. Dalalyq lagerde ashana, monsha, turmystyq qamtamasyz etý bólmesi, medpýnktter qoıylyp, kazarmalyq pýnkt ázirlengen. Lager elektr qýaty jáne jylýmen qamtamasyz etilgen. Sonymen qatar birikken medıtsınalyq pýnkt jáne jyljymaly sanıtarlyq-epıdemıologııalyq zerthana jabdyqtaldy.