QR Qorǵanys mınıstri Saryózek garnızonyn tekserýge bardy (FOTO)
Tekseris kezinde oqý-jaýyngerlik daıarlyq, áskerı bólimderdiń jazǵy oqytý kezeńine ázirligi máseleleri qaraldy. Sondaı-aq merzimdi qyzmettegi áskerı qyzmetshiniń qaza bolý deregi egjeı-tegjeıli talqylandy, dep habarlaıdy QR QM baspasóz qyzmeti.
Oqıǵanyń sebepteri joǵaryda atalǵan bólim laýazymdy adamdarynyń áskerı qyzmet ótkerý barysynda qaýipsizdik sharalaryn qamtamasyz etý jónindegi talaptardy elemeýi saldarynan boldy.
«Ádette, áskerlerde oryn alatyn qaıǵyly oqıǵalarda qaýipsizdik sharalarynyń buzylýy, baqylaýdyń bolmaýy jáne laýazymdy adamnyń nemquraılyǵy sebepker bolady», - dedi syn kózben kóshpeli keńes kezinde sóz sóılegen qorǵanys vedomstvosynyń basshysy.
Keńesti qorytyndylaı otyryp, Qorǵanys mınıstri «Atalǵan fakti boıynsha qylmystyq is qozǵalǵany óte durys jáne barlyq kináli adamdar laıyqty jazalaryn alýy tıis», - dep oıyn túıindedi.
Tekseris aıaqtalǵannan keıin kadrlyq jáne tártiptik sheshimder qabyldanady.
Esterińizge sala ketsek, 21 mamyr kúni 12740 áskerı bóliminde park-sharýashylyq kúni ótkizilgen bolatyn. Onyń aıasynda bólim, urys mashınalary parkiniń aýmaǵynda, bólimshelerdiń ishinde jumystar uıymdastyryldy. Ǵımaratty bólshekteý boıynsha jumystardy oryndaý kezinde qurylystyń bóligi opyrylyp túsedi. Sonyń saldarynan qurylys elementteriniń biri sol mańaıda turǵan 12740 áskerı bóliminiń merzimdi qyzmettegi qatardaǵy jaýyngeri E. Jaqashevtiń ústine qulaıdy. Saldarynan aýyr jaraqattan áskerı qyzmetshi Saryózek kentiniń lazaretinde kóz jumdy.
