QR Qorǵanys mınıstri Qurlyq áskerleri Áskerı ınstıtýtynyń úzdik ofıtser túlekterin marapattady (FOTO)

ASTANA. QazAqparat - Búgin, 8 jeltoqsanda 61993 áskerı bóliminde QR Qurlyq áskerleri Áskerı ınstıtýtyn 2013 jyly bitirgen jas ofıtserlerdi saltanatty marapattaý rásimi ótti, dep habarlaıdy QR QM baspasóz qyzmeti.

Bul bozbalalar eki jyl buryn áskerı ınstıtýtty támamdap, Qazaqstannyń Qarýly Kúshterindegi áskerı qyzmette joǵary nátıjelerge qol jetkizdi.

«Jaqyn arada Memleket basshysy Qazaqstan halqyna jyl saıynǵy Joldaýyn jarııalady. Joldaýda «zamanaýı jahandyq shynaıylyqtyń aıtyp kelmeıtin qaýip-qaterine» nazar aýdaryp, álemdegi jáne elimizdiń tóńiregindegi qalyptasqan ahýaldyń barlyq qaýiptiligin atap ótti. Bul jerde basty áńgime qaýipsizdikti qamtamasyz etýde bolyp otyr. Osynaý qaýipsizdiktiń kepili Otan qorǵaýshylarǵa tárbıe berip júrgen kásibı ofıtserler men jaýyngerlik qabiletti armııa bolyp sanalady. Olar jaýyngerlik ázirlikti nyǵaıtyp qana qoımaı, jalpy Qarýly Kúshterdiń joǵary rýhy men aıbyndylyǵyn asqaqtatýǵa kúsh salady. Búgingi sharanyń dástúrli sıpatyna qaramastan, óziniń mán-maǵynasy boıynsha erekshe mańyzǵa ıe. Bul jastardyń kóshbasshylyq qasıetterin qoldaýǵa baǵyttalǵan Elbasy bastamalarynyń naqty jalǵasy», - dedi QR Qorǵanys mınıstri Imanǵalı Tasmaǵambetov.

Óziniń kúsh-jigerin áskerı qyzmetke sarp etken ofıtserler búginde qajyrly eńbekterimen qazaqstandyq armııa Qurlyq áskerleriniń qorǵanys qabilettiligin nyǵaıtýǵa atsalysýda.

Búgin QR qorǵanys vedomstvosy basshysynyń qolynan jas ofıtserler gramotalar, baǵaly syılyqtar jáne «Úzdik maman komandır» qapsyrmalaryn aldy.

Jas ofıtserler jáne jaýyngerlik saıystyń úzdikterimen kezdesý jyl saıynǵy dástúrge aınalyp, jastardy jáne olardyń kóshbasshylyq qozǵalysyn qoldaý jónindegi Elbasynyń saıasatyn iske asyrýdaǵy aıtýly shara bolyp otyr.

«Eki jyl buryn Qurlyq áskerleriniń Áskerı ınstıtýty qabyrǵasynda ofıtserlerdiń kásibı bolashaǵyn ǵana emes, sonymen birge olardyń komandalyq kóshbasshylyq qasıetterin aıqyndaıtyn biregeı tetik júzege asyrylǵan bolatyn. Búgin baıqaǵanymyzdaı, atalǵan jobanyń nátıjeleri júıeniń sátti oryndalǵandyǵyn jáne óziniń bastapqy maqsatyn aqtaǵandyǵyn kórsetti», - dep atap ótti QR Qorǵanys mınıstri Imanǵalı Tasmaǵambetov.

Jas ofıtserler tobynyń qyzmetin baǵalaý qorytyndysy olardyń eki jyl ýaqyt ishinde joǵary jetistikterge jetkenin kórsetti. Olardyń 90 paıyzy joǵary áskerı laýazymǵa usynyldy.