QR Qorǵanys mınıstri kenetten oqý-jattyǵýlardyń ótkizilý barysyn tekserdi
Oqý-jattyǵý barysyn tekserý kezinde qorǵanys vedomstvosynyń basshysy daǵdarys aýdanyn oqshaýlaý jónindegi tapsyrmalardyń oryndalýynyń uıymdastyrylý máseleleri boıynsha desanttyq-shabýyldaý áskerleriniń qolbasshysyn tyńdap, bólimshelerdiń ornalasqan bekinisterin, komandalyq pýnkti men materıaldyq-tehnıkalyq qamtamasyz etý pýnktiniń jumysyn tekserdi, sondaı-aq, shartty daǵdarys aýdanynda ushyp ótti.
Ótip jatqan kenetten oqý-jattyǵý sheńberinde «Mátibulaq» polıgonynda daǵdarys aýdanyn barlaý uıymdastyryldy. Barlaý toptary ushqyshsyz ushý apparattary aıqyndaǵan jáne jerdiń ǵaryshtyq keskinderinen alynǵan derekter negizinde nysandardy barlaýdy júrgizdi.
Arnaıy maqsattaǵy bólimsheler zańsyz qarýly quralymdardyń shartty toptaryn anyqtady. Qolbasshylyqpen daǵdarys aýdanyn oqshaýlaý jóninde sheshim qabyldandy. Desanttyq-shabýyldaý bólimsheleri jaýyngerlik tehnıkada shoǵyrlaný aýdandarynan kórsetilgen baǵdarlar arqyly jyljydy jáne túsirilgen taktıkalyq áýe desantymen birlese jergilikti jerdi oqshaýlady. Ol jerden boljaldy qarsylas tabyldy.
Qorǵanys vedomstvosynyń basshysy qondyrý tásili arqyly daǵdarys aýdanynyń asa mańyzdy shepteri men jerdiń ýchaskelerinde taktıkalyq áýe desantynyń túsirilýin baqylady.
Qozǵalystyń negizgi baǵyttarynda blok-beketter óristetilip, komendanttyq qyzmet uıymdastyryldy. Kelip-ketip jatqan avtomobılder men azamattardy jiti tekserý júrgizilýde. Daǵdarys aýdanyna irgeles ornalasqan eldi mekenderde dıversııaǵa qarsy qaýipsizdikti uıymdastyrý boıynsha is-sharalar kúsheıtildi.
Oqý-jattyǵý sheńberinde QR Qorǵanys mınıstri arnaıy áskerı is-qımyldardy júrgizý amaldary men tásilderin jáne basqarý pýnktteriniń jumysyn uıymdastyrý tártibin jetildirý jóninde nusqaýlar berdi.
Odan basqa, qorǵanys vedomstvosynyń basshysy Qurlyq áskerleri Áskerı ınstıtýtynyń oqý-jattyǵý ortalyǵyna baryp, dalalyq jaǵdaıdaǵy kýrsanttardyń daıyndyq barysyn tekserdi. Qorǵanys mınıstri kýrsanttardy daıarlaý júıesin jetildirý jóninde ınstıtýt basshylyǵyna nusqaýlar berdi. 
