QR Qorǵanys mınıstri Qazaqstan aýmaǵynda ótetin Armııa halyqaralyq oıyndaryna daıyndyqty tekserdi (FOTO)

ASTANA. QazAqparat - Búgin, 4 naýryzda Qazaqstan Respýblıkasynyń Qorǵanys mınıstri Imanǵalı Tasmaǵambetov «Otar» áskerı bazasynyń aýmaǵynda «ArMI-2016» Armııa halyqaralyq oıyndaryn ótkizýdi uıymdastyrý jóninde kóshpeli keńes ótkizdi, dep habarlaıdy QR QM baspasóz qyzmeti.

Bıylǵy jyldyń jazynda ártúrli memleketterdiń Qarýly Kúshteri áskerı qyzmetshileriniń dalalyq, áýe jáne teńiz daǵdysy boıynsha Armııa halyqaralyq oıyndarynyń 23 baıqaýynyń ótkizilýi josparlanǵan.

Oıyndar Qazaqstan men Reseı Federatsııasynyń aýmaǵynda alǵash ret ótedi.

Elimizde «Artıllerııalyq atys sheberi» jáne «Mergen shebi» atty 2 baıqaýdy ótkizý josparlanýda. Áskerı qyzmetshilerimiz barlyq atalymdarda, naqtyraq aıtsaq, 21 konkýrsta baq synaıdy. Saıysty ótkizý ornynda ırektútik, mına-jarylǵysh qorshaýy, oba, joltaban kópiri ispetti kedergileri bar qashyqtyqyǵy 2 shaqyrym jerde artıllerııashylardyń baıqaýyn ótkizý úshin dańǵyl joldyń, sondaı-aq mergendik vıntovkadan, tapanshadan atý jáne granatalar laqtyrý úshin barlaýshynyń soqpaq jolynyń elementteri bar mergenderdiń baıqaýyn ótkizý úshin dańǵyl joldyń salynýy josparlanǵan.

«Artıllerııalyq atys sheberi» baıqaýyna árbir memleketten 21 adamnan quralǵan komanda, onyń ishinde 5 adamǵa deıin 3 mınaatqysh eseptoby qatysady. Baıqaýdy ótkizý úshin ár komandaǵa kóp nysanaly jeńil brondalǵan tartqysh, mınaatqyshtar, avtomattar jáne granaatqyshtar usynylatyn bolady.

«Mergen shebi» baıqaýyna árbir memleketten 7 adamnan turatyn komanda, onyń ishinde 3 mergendik jup qatysady. Baıqaýdy ótkizý úshin ár komandaǵa optıkalyq kózdeýishi jáne «Aselsan» túngi kózdeýishi bar Dragýnovtyń mergendik vıntovkalary usynylady.

Ótken jyly alǵashqy «ArMI-2015» Armııa halyqaralyq oıyndary ótkenin esterińizge sala keteıik.