QR Qorǵanys mınıstri qaza bolǵan áskerı qyzmetshilerdiń ata-analaryna memlekettik nagradalar tabys etti (FOTO)

ASTANA. QazAqparat - Búgin, Astanada QR Qorǵanys mınıstri Imanǵalı Tasmaǵambetov aǵymdaǵy jyldyń kúzinde áskerı mindetin oryndaý kezinde qaıtys bolǵan áskerı qyzmetshilerdiń ata-analaryna memlekettik nagradalar tabystady.

«Búgin Elbasy - QR QK Joǵarǵy Bas Qolbasshysynyń arnaıy Jarlyǵymen Otany men halqy aldynda óz boryshyn oryndaı otyryp, batyldyq tanytyp, opat bolǵan sarbazdar marapattalady. Bul esimderi máńgi jadymyzda qalatyn aıbyndy áskerı qyzmetshilerimizdi qurmetteý belgisi. Maqsatymyz medaldardy tabystaý ǵana emes, sonymen birge qaıǵylaryńyzǵa ortaq bolý bolyp tabylady. Árıne, anasy men ákesine qaza bolǵan uldaryn eshbir marapat qaıtara almaıdy. Biz ony jaqsy túsinemiz. Alaıda, ózgelerge úlgi-ónege bolyp tabylatyn sarbazdyń batyldyǵynyń mańyzdylyǵyn, Otan qorǵaýshysynyń abyroıyn, áskerı qyzmetshiniń beınesin eshkim joqqa shyǵara almaıdy. Bul medaldar jubanysh bolyp tabylmaıdy, biraq, maqtaýǵa turarlyq ul tárbıelep ósirgen ata-analar úshin naǵyz halyqtyń syı-qurmeti ispetti», - dedi QR Qorǵanys mınıstri Imanǵalı Tasmaǵambetov.

Qaza bolǵannan keıin ulan qatardaǵy jaýyngeri Asyljan Mahambetov, ulan qatardaǵy jaýyngeri Zamır Ádilov, ulan qatardaǵy jaýyngeri Baýyrjan Joldybaı jáne ulan qatardaǵy jaýyngeri Baǵytjan Qalybaı «Erligi úshin» medaldaryn ıelendi.

Esterińizge sala ketsek, qaıǵyly oqıǵa Aqtaýda 18 qyrkúıekte «Ortalyq-2015» oqý-jattyǵýynyń 2-kezeńin ótkizý kezinde oryn aldy. Oqý-jattyǵý barysynda 4 áskerı qyzmetshi sýǵa batyp ketti. Búgingi kúni tergeý áli jalǵasýda, dep habarlaıdy QR QM baspasóz qyzmeti.