QR Qorǵanys mınıstri Qarýly Kúshterde qyzmet atqaratyn qyz-kelinshekterdi kóktem merekesimen quttyqtady

ASTANA. 7 naýryz. QazAqparat - Halyqaralyq áıelder merekesi qarsańynda Qorǵanys mınıstrliginde vedomstvo basshysy Ádilbek Jaqsybekovtiń Qarýly Kúshterde qyzmet atqaratyn qyz-kelinshekterdi saltanatty túrde qabyldaýy bolyp ótti,

dep habarlady mekemeniń baspasóz qyzmeti.  

Qabyldaýǵa qatysýshylardy Qorǵanys mınıstri kóktemniń tamasha merekesimen quttyqtap, olarǵa zor densaýlyq, otbasy baqytyn, sulýlyq pen kóterińki kóńil-kúı jáne eńbekte tabys tiledi.

«Búgin myna zalda ártúrli áskerı mamandyq ıeleri - mergender, baılanysshylar, medıtsına, tyl, qarjy jáne kadr organdarynyń  qyzmetshileri qatysyp otyr, - dep atap ótti Qorǵanys mınıstri. - Qazaqstan armııasynyń kelisim-shart qyzmeti men qyzmetshileriniń áıel-ofıtserler otrıadyn sizder elimizge tanytyp kelesizder. Sizder januıanyń berekesin saqtaýshy - anasyzdar, sonymen birge óz taǵdyrlaryńyzdy Qarýly Kúshtermen baılanystyryp, erlermen bir qatarda áskerı qyzmettiń  ystyǵy men sýyǵyn  ózara bólisip júrsizder».

Qorǵanys mınıstri áskerı qyzmettegi  qyz-kelinshekterge gúl shoqtaryn syılap, sonymen qatar, keıbir qyzmetkerlerge úlgili tártibi men qyzmettegi jetistikteri úshin «leıtenant» pogondaryn tapsyrdy.

Saltanatty sharanyń sońynda qazaqstan armııasynyń basshy quramy  pogon taqqan áıelderdi  kóktemniń, ıaǵnı, jańarý, jasarý merziminiń alǵashqy merekesimen quttyqtap, búkil álemde bizderge ómir men baqyt syılaýshy - analarymyzǵa, qaryndastarymyzǵa, aıaýlylarymyzǵa qurmet kórsetti.