QR Qorǵanys mınıstri: Áskerı qyzmet árqashan qaýip pen qaterge toly

NUR-SULTAN. QazAqparat - Qorǵanys vedomstvosynyń basshysy general-leıtenant Murat Bektanov apparattyq keńes barysynda Qarýly Kúshterde Prezıdenttiń Qazaqstan halqyna Joldaýyn iske asyrýǵa qatysty birqatar tapsyrmalar berdi. Bul týraly QazAqparat Qorǵanys mınıstrliginiń baspasóz qyzmetine silteme jasap habarlaıdy.

Qorǵanys mınıstri áskerge qatysty aspektilerge nazar aýdara otyryp, Joldaýdyń negizgi erejelerin jetkizdi.

Qorǵanys qabiletin nyǵaıtý, qaýip-qaterlerge jedel den qoıýdy arttyrý aıasynda, 3 qyrkúıekten bastap-aq Qarýly Kúshterde áskerlerdi qaýyrt tekserý júrgizilýde. Áskerı quralymdar men bólimder jaýyngerlik oqý-jattyǵý tapsyrmalaryn oryndaý úshin turaqty ornalasqan pýnktterinen eldiń basqa óńirlerine jiberiledi.

Qorǵanys vedomstvosynyń basshysy oryn alýy múmkin qaýipter men qaterlerge sáıkes áskerlerdiń is júzindegi áreketin tolyq deńgeıde tekserýdi tapsyrdy.

Ótken demalys kúnderi Jambyl oblysyndaǵy ınjenerlik oq-dáriler qoımasyna barǵan qorǵanys vedomstvosynyń basshysy qaza tapqandardyń otbasylaryna jáne barlyq zardap shekkenderge jan-jaqty kómek kórsetýdi jalǵastyrýdy tapsyrdy.

Murat Bektanov oqıǵa saldaryn joıýǵa qajetti kúshter men quraldardy tartýdy júktedi. Belgilengen qaýipsizdik sharalaryn saqtaı otyryp, barlyq jumystar barynsha qysqa merzimde júrgizilýi tıis.

Qorǵanys mınıstrliginiń Bas ınspektsııasy qazirgi ýaqytta oq-dáriler qoımalaryn tekserýge qatysty júrgizilip jatqan is-sharalar jóninde baıandady. Qorǵanys mınıstri komıssııaǵa ınspektsııalaý nátıjeleri týraly tez arada aqparat berýdi jáne oq-dárilerdi saqtaý obektileri men halyqtyń qaýipsizdigin qamtamasyz etý boıynsha qajetti sharalardy qabyldaýǵa bastama tanytýdy tapsyrdy.

Qorǵanys vedomstvosynyń basshysy jeke quramǵa beınekonferentsbaılanys rejıminde shyqty. Burynǵy Qorǵanys mınıstri naǵyz ofıtser retinde barlyq jaýapkershilikti óz moınyna alyp, otstavkaǵa bergenin atap ótti.

Sonymen qatar, ol jalpyáskerı jarǵylarda árbir laýazymdy tulǵanyń mindetteri kózdelgenin eske saldy. Bul rette barlyq áskerı qyzmetshiler tapsyrylǵan jumysqa zańdy ári moraldy turǵyda jaýapty bolýy tıis.

General-leıtenant Murat Bektanov laýazymdy tulǵalardyń quzyretine nazar aýdardy. Ol úshin jaýapty jáne basshy laýazymdarǵa qajetti tájirıbesi bar jáne muqııat konkýrstyq irikteýden ótken adamdar taǵaıyndalýy tıis.

Qorǵanys mınıstri Qarýly Kúshterde negizinen kásibı daıyndalǵan áskerı qyzmetshiler, óz eliniń patrıottary qyzmet atqaratynyn atap ótti. Sonymen qatar, kez kelgen qatelik nemese jańsaqtyq aýyr zardaptarǵa ákep soǵýy múmkin.

«Áskerı qyzmetshiler qarý-jaraqpen, jaýyngerlik tehnıkamen, oq-dárilermen jáne jarylǵysh zattarmen udaıy jumys isteıdi. Áskerı qyzmet árqashan qaýip pen qaterge toly. Sonda da árbirimiz qatelik jasaýǵa quqymyz joq. Mndetterin tıisinshe oryndamaǵan jaǵdaıda, onyń suraýy da qatań bolady», – dedi Qorǵanys mınıstri.