QR Qorǵanys mınıstri Armııa halyqaralyq oıyndary - 2016 saıysynyń jeńimpazdaryn marapattady

ASTANA. QazAqparat - Búgin, 9 tamyzda Qazaqstannyń «Gvardeısk» polıgonynda «Artıllerııalyq oq atý sheberleri» men «Mergen shebi» baıqaýlarynyń jeńimpazdaryn saltanatty marapattaý rásimi ótti. Qazaqstannyń jerinde alǵash ret ótken Armııa halyqaralyq oıyndary - 2016 halyqaralyq týrnırleriniń jeńimpazdaryn QR Qorǵanys mınıstri Imanǵalı Tasmaǵambetov quttyqtady, dep habarlaıdy mınıstrliktiń baspasóz qyzmeti.

«Biz «áskerı rýh» jáne «jaýyngerlik baýyrlastyq» sııaqty qarapaıym, biraq, syıymdy uǵymdardyń sana-sezimimizde kúsh pen mán-maǵynany shynaıy nyǵaıtatyn tamasha jáne ıgi dástúrdiń kýási boldyq.  Bul asa mańyzdy. Osynaý saıystardy ótkize otyryp, biz barlyǵyna eń aldymen, beıbit aspan asynda tatýlyq pen  órkendeýde ómir súrýge degen yntyzarlyǵymyzdy dáleldeımiz.  Osy qundylyqtar Armııa halyqaralyq oıyndarynyń ıdeıasynda jáne onyń árbir qatysýshysynyń júreginiń túkpirinde jatyr. Sondyqtan ár elden kelgen dostarymyzben qaýyshý, olarmen bar bilgenimiz jáne tájirıbe bólisý, birlik pen baýyrlastyq rýhyn seziný  biz úshin úlken abyroı», - dedi  Imanǵalı Tasmaǵambetov.   

Qazaqstannyń áskerı qyzmetshileri eki baıqaýdyń absolıýttik jeńimpazdary atandy. «Artıllerııalyq oq atý sheberleri» baıqaýynda Reseı komandasy ekinshi orynǵa jaıǵasty, Qytaı komandasy úshinshi oryndy, olardyń artynan ilesken Qyrǵyzstan jáne Venesýela komandalary boldy. Bul rette «Úzdik mınaatqysh komandıri» retinde QHR-dyń serjanty Chjaı Chjıtao marapatqa ıe bolsa, Reseıdiń aǵa matrosy Ildar Faızýllın «Úzdik kózdeýshi» bolyp tanyldy, al Qazaqstannyń serjanty Janataev Tólepbek «Úzdik mehanık-júrgizýshi» degen marapatqa ıe boldy.  «Mergen shebi» baıqaýynda sáıkesinshe Reseı jáne Belarýs ekinshi jáne úshinshi oryndardy enshiledi. Jeke esepte Belarýsten kelgen praporşık Vadım Rebkovets úzdik mergen, al úzdik mergen juby Reseıden kelgen aǵa serjant Andreı Mıachın men serjant Pavel Petravıchıýs  bolyp tanyldy.

Úzdik mergen men artıllerııashylardyń qurmetine bul kúni polıgonda qazaqstandyq estrada juldyzdarynyń oryndaýynda patrıottyq kompozıtsııalar shyrqaldy, áskerı qyzmetshilerdiń fleshmoby jáne kórsetpeli oq atýy ótti.

Tamyzdyń 2-i  men 9-y aralyǵynda Otarda alǵash ret Armııa halyqaralyq oıyndary sheńberinde artıllerııashylar men mergenderdiń baıqaýlary ótkenin esterińizge sala keteıik. Bul kúnderi 12 eldiń komandalary arasynda ymyrasyz báseke boldy. 278 áskerı qyzmetshi dene kúshi men tózimdilik, kásipqoılyq pen áskerı sheberlik turǵysynda baq synasty. Bul rette saıys kúndizgi jáne túngi jaǵdaılarda ótkizildi. Alǵash ret túngi ýaqytta qatysýshylar qazaqstandyq óndiristiń túngi kórý prıborlaryn qoldana otyryp, oq atýlardy oryndady.