QR Qorǵanys mınıstri Aqtaýdaǵy alǵashqy áskerı pırsti ashty
Korablderdiń jeke ornalasý pýnktiniń bolýy Kaspıı teńiziniń qazaqstandyq sektorynda yqtımal qaýip-qaterlerge tıimdi jáne ýaqtyly den qoıýǵa, jetkizip berýdi ýaqtyly uıymdastyrýǵa jáne materıaldyq-tehnıkalyq qamtamasyz etýdiń barlyq túrlerimen qamtamasyz etýge, korablderdiń shoǵyrlaný aýdandaryna shyǵýyn jedel júzege asyrýǵa múmkindik beredi, dep habarlaıdy QR Qorǵanys mınıstrliginiń baspasóz qyzmeti.
Pırs birden onnan asa korabldiń turaqtaý múmkinshiligimen Aqtaý halyqaralyq teńiz saýda portynyń aýmaǵynda ornalasqan.
«Qarýly Kúshterdiń Joǵarǵy Bas Qolbasshysy Nursultan Nazarbaev qazaqstandyq armııanyń materıaldyq-tehnıkalyq bazasyn jetildirýge erekshe kóńil bóledi. Áskerı qyzmetshilerdiń qyzmet etý jaǵdaıyn jaqsartý maqsatynda strategııalyq turǵyda mańyzdy nysandar paıdalanýǵa berilip, áskerı qalashyqtar men garnızondardyń áleýmettik ınfraqurylymy jetildirilýde. Jetkilikti ınfraqurylymy bar jeke pırstiń qurylýy Qazaqstan Áskerı-teńiz kúshteriniń korablderin tehnıkalyq ázirlikte ustaý, qoıylǵan tapsyrmalardy sheshý kezinde qysqa merzimde olardyń jaýyngerlik qabilettiligin saqtaý jáne qalpyna keltirý úshin asa mańyzdy jaǵdaı bolyp tabylady», - dep atap ótti QR Qorǵanys mınıstri.
Odan basqa, Aqtaý garnızonyna jumys sapary sheńberinde QR Qorǵanys mınıstri batys baǵytynda áskerlerdiń ózindik jetkilikti toptamasyn qamtamasyz etetin materıaldyq-tehnıkalyq quraldarǵa arnalǵan saqtaý oryndaryn qamtıtyn batys baǵytyndaǵy Qarýly Kúshterdiń materıaldyq-tehnıkalyq bazasynyń qurylys barysymen egjeı-tegjeıli tanysty.
