QR qorǵanys kásiporyndary óndiristik protsesterdi tolyqtaı tsıfrlandyrady

«Qazaqstan ınjınırıng» Ulttyq kompanııasy» AQ jáne onyń enshiles kásiporyndary óndiristik protsesterdi tolyqtaı tsıfrlandyrady», - dep málimdedi QR Qorǵanys jáne aeroǵarysh ónerkásibi mınıstrliginiń baspasóz qyzmeti.
Keıbir kásiporyndarda qazirdiń ózinde óndiris isi tsıfrlyq formatqa kóshken. Budan bólek, eldegi túrli salalardy tsıfrlandyrýǵa qajetti qondyrǵylar shyǵarylyp jatyr.
Atap aıtqanda, «Oral «Zenıt» zaýyty» aktsıonerlik qoǵamynda qaǵaz qujattamalardan arylýǵa múmkindik beretin avtomattandyrylǵan plazmalyq jáne gaz-plazmalyq kesý kesheni satyp alyndy, shyǵarylyp jatqan ónimderdi avtomatty josparlaý men monıtorıng jasaý júıesi engizildi.
«S.M. Kırov atyndaǵy zaýyt» AQ-da jeke esepteý aspaptarynan derekterdi jınap, óńdeıtin tsıfrlyq júıege arnalǵan qondyrǵylardy shyǵarý, «Qyzyljar sý» JShS dıspetcherlik júıesin qurý, t.b. jumys júrgizilip jatyr.
«Qazaqstan Aselsan ınjınırıng» JShS-de ǵylymı-zertteý jáne tájirıbelik-konstrýktorlyq jumystar bólimi quryldy. «Qazaqstan avıatsııa ındýstrııasy» JShS-de óndiristiń konstrýktorlyq-tehnıkalyq daıyndyǵyn avtomattandyrý bastaldy.
«Osynyń arqasynda kásiporyndardaǵy eńbek ónimdiligi artyp, óndiristik resýrstardy paıdalanýdy josparlaý jaqsardy», - deıdi baspasóz qyzmetiniń ókilderi.