QR Qorǵanys mınıstrligi Golan jotalaryndaǵy bitimgerlerdiń qaýipsizdigi úshin qajetti shara qabyldap jatyr

ASTANA. KAZINFORM - Qazaqstandyq bitimgerler qyzmet etetin BUU-nyń Golan jotalaryndaǵy (SONNR) jaýapkershilik aımaǵyndaǵy jaǵdaı shıelenisti, biraq turaqty dep baǵalanyp otyr. Bul týraly QR Qorǵanys mınıstrligi habarlady.

- Mıssııanyń jeke quramy mandatqa sáıkes óz fýnktsııalaryn oryndap jatyr. BUU kúshteriniń ajyrasýdy baqylaý jónindegi ýákiletti tulǵalary sırııalyq jáne ızraıldik taraptardyń ókilderimen turaqty baılanysta. Bitimgerlerdiń qaýipsizdigin qamtamasyz etý maqsatynda qajetti sharalar qabyldanyp jatyr. Qazaqstan Respýblıkasynyń Qorǵanys mınıstrligi jaǵdaıdyń damýyn baqylaýda ustap otyr, - delingen mınıstrlik habarlamasynda.

Golan jotalaryndaǵy qazaqstandyq áskerı qyzmetshilermen turaqty baılanys ornaǵan. Qajet bolǵan jaǵdaıda mıssııany evakýatsııalaýdy BUU basshylyǵy mıssııa qolbasshylyǵynyń usynysy boıynsha qaraıtyn bolady.

Izraıl Sırııamen shekarada ornalasqan Golan bıigindegi býferlik aımaqqa áskerin jibergenin jazǵan bolatynbyz.