QR Kólik mınıstrligi aerotaksı men qalalyq áýe mobıldiligi boıynsha zańnamaǵa túzetýler ázirledi
ASTANA. KAZINFORM - Alatau City-de QR Kólik vıtse-mınıstri Talǵat Lastaevtyń, «Qazaqstannyń avıatsııalyq ákimshiligi» AQ Bas atqarýshy dırektory Maıkl Denıeldiń, sondaı-aq «Alatau Advance Air Group Ltd» (AAAG) jáne «AutoFlight» kompanııalary ókilderiniń qatysýymen eVTOL aerotaksıiniń tehnıkalyq synaq ushýlary ótkizildi.
QR Kólik mınıstrligi baspasóz qyzmetiniń habarlaýynsha, aerotaksı elektrli qozǵaltqyshtarmen jumys isteıtin ınnovatsııalyq ári ekologııalyq taza áýe kóligi túri bolyp tabylady. Áýe kemesi saǵatyna 200 shaqyrymǵa deıin maksımaldy jyldamdyqty damytýǵa jáne 200 shaqyrymǵa deıingi qashyqtyqqa ushýdy oryndaýǵa qabiletti, bul qalalyq jáne óńirlik áýe mobıldiligi mindetterin tıimdi sheshýdi qamtamasyz etedi.
Kólik mınıstrligi atalǵan kólik túrin engizýge qatysýshy kompanııalarmen birlesip, bir jyl boıy qajetti normatıvtik-quqyqtyq bazany qalyptastyrý boıynsha jumys júrgizdi. Osy qyzmet sheńberinde aerotaksıdi paıdalaný jáne zamanaýı áýe mobıldiligin damytý máselelerin retteýge baǵyttalǵan zańnamalyq túzetýler ázirlendi.
Qazirgi ýaqytta daıyndalǵan ózgerister kelisýden ótip, talqylaý kezeńinde, al olardy qabyldaý jáne Qazaqstan Respýblıkasynyń zańnamasyna engizý jaqyn arada josparlanyp otyr.
Sonymen qatar, mamandandyrylǵan ınfraqurylymdy qurý jumystary júrgizilip jatyr. Vertıporttardyń tujyrymdamasy men dızaınyn álemniń túrli elderinde uqsas nysandardy jobalaý tájirıbesi bar halyqaralyq ıtalıandyq kompanııa ázirleý ústinde.
2028 jylǵa deıin barlyǵy alty vertıport salý josparlanǵan, olar qaýipsizdik, kóliktik qoljetimdilik jáne qoldanystaǵy ınfraqurylymmen ıntegratsııalaný talaptaryn eskere otyryp, strategııalyq mańyzy bar qalalyq jáne kóliktik toraptarda ornalastyrylatyn bolady.
Osyǵan deıin Alataý qalasynda aerotaksı usha bastaǵany týraly jazdyq.
