QR Kólikkommın áýe kemeleri ekıpajdarynyń jumys ýaqytyn uıymdastyrý boıynsha ereje talaptaryn qataıtýda
ASTANA. 9 qazan. QazAqparat - Azamattyq jáne eksperımentaldy avıatsııanyń áýe kemeleriniń ekıpajdarynyń jumys ýaqyty men demalýyn uıymdastyrý Erejelerine ushý qaýipsizdigin arttyrýǵa baǵyttalǵan ózgerister engiziledi.
Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady.
Aıtalyq, jańa Erejelerge sáıkes ushý quramynyń 28 kezekti kúntizbelik kúnderi boıyndaǵy ushý ýaqyty 100 saǵattan aspaýy tıis. Onda da 85 saǵat ushýdan soń avıakompanııanyń josparlaý qyzmeti ekıpaj múshesin reıske tek qana onyń jazbasha kelisimi arqyly qoıa alady.
Sonymen birge, Erejeler boıynsha pılottardyń ushýlaryna jiberýdiń jyldyq ruqsat etilý uzaqtyǵy 800 saǵat mólsherinde belgilengen, degenmen ol densaýlyǵynyń múmkindigine qaraı óz qalaýymen 900 saǵatqa deıin jumys jalǵastyrýyna bolady.
Erejelerde ekıpajdyń demalýyn uıymdastyrýǵa aıryqsha mán berilgen. Azamattyq avıatsııa komıtetiniń ushýdy paıdalaný basqarmasynyń basshysy Berik Asanovtyń aıtýynsha «Ushý qaýipsizdigi ushý quramynyń mezgilinde demalýyna tikeleı baılanysty. Sondyqtan demalýy tolyqtaı uıymdastyrylýy kerek. Mysaly, endigi jerde jańartylǵan erejege sáıkes túngi aýysymda reıs atqarǵan ekıpajdyń demalý ýaqyty uzartylady.
Bul shara ekıpaj múshelerine tolyqtaı demalýǵa qajetti ýaqyt bermeı olardy qatarynan birneshe ret túngi aýysymǵa qoımaýy úshin qajet. Bul óte qaýipti, óıtkeni sharshaǵan pılot qatelikke urynýy ábden múmkin».
Erejelerde uzaq ushýlar kezinde pılottardyń biriniń ushý barysynda demalyp alýy úshin ony aýystyrý qajettigine qaraı kúsheıtilgen ekıpaj jaraqtaý eskerilgen. Onda da úshinshi pılottyń biliktiligi aýystyrylatyn pılottyń biliktiliginen kem bolmaýy áýe kemesin basqarýdaǵy laýazymdyq mindetterine saı bolýy mindetti.
Ekıpajdyń jumys ýaqyty men demalýyn uıymdastyrýǵa baqylaýdy qataıtý arqyly Azamattyq avıatsııa komıteti ekıpajdyń asa sharshaýyna jol bermeı, ushý qaýipsizdigi deńgeıin kóterýdi josparlaýda. Berik Asanovtyń aıtýyna qaraǵanda «Erejelerdi saqtamaǵan avıakompanııalar men ekıpajdar qatań jazalatyn bolady». Bul erejelerdiń júzege asýyn AAK-niń quramyna kiretin ushý paıdalaný basqarmasynyń ınspektorlary baqylap otyrady.
Ushý paıdalaný basqarmasy qazirgi kezde árqaısynyń ushqan ýaqyty kem degende 15 000 saǵat bolǵan kásibı pılottarmen, túrli áýe kemeleriniń komandırlerimen tolyqtyrylǵan.
