QR Kólik jáne kommýnıkatsııa mınıstrliginde temirjol kóligindegi jolaýshylar tasymalyn jetildirý máselesi talqylandy
ASTANA. Sáýirdiń 17-si. QazAqparat - Keshe, sáýirdiń 16-sy kúni QR Kólik jáne kommýnıkatsııa mınıstrliginde «Samuryq - Qazyna» Ál-aýqat qory» AQ, «Qazaqstan temir joly» UK» AQ jáne «Jolaýshylar tasymaly» AQ ókilderiniń qatysýmen temirjol kóligindegi jolaýshylar tasymaly máselesi boıynsha keńes ótti.
Kólik jáne kommýnıkatsııa mınıstrliginiń baspasóz qyzmetinen habarlaǵandaı, kezdesý barysynda jolaýshy tasymaly sharýashylyǵynyń aǵymdaǵy jaǵdaıy jáne jolaýshylar tasymalynyń shyǵyndaryn qysqartý men paıdalaný, qarjy kórsetkishteri boıynsha statıstıkalyq esepterdi jınaqtaý men óńdeý júıesin jetildirý úshin «Ekspress-3» avtomattandyrylǵan basqarý júıesiniń jumysyn jaqsartý máseleleri talqylandy.
Strategııalyq josparlaý jáne kólik-kommýnıkatsııa keshenin damytý departamenti dırektorynyń orynbasary Nesipgúl Esembaevanyń aıtýynsha, qazirgi ýaqyttaǵy jolaýshylar tasymaldaý salasyndaǵy túıitkilderdi sheshý úshin, bul salaǵa egjeı-tegjeıli saraptama jasaý qajet.
Olardyń arasynda qyzmet kórsetý salasy udaıy nazardy talap etetin ózekti másele. Keshendi sharalarǵa qaramastan, bıletterdiń joqtyǵy men vagondardyń talapqa saı bolmaýy áli de oryn alýda.
«Samuryq - Qazyna» ÁAQ-nyń bas sarapshysy Sergeı Talko atalǵan máselelerdiń barlyǵyna da tereń saraptama qajet ekendigimen kelisti. Osy máselelerdi jan-jaqty qaraý úshin búgingi tańda arnaıy jumys toby jumys jasaýda, onyń quramynda barlyq múddeli memlekettik organdar men «Samuryq - Qazyna» ÁAQ jáne «Qazaqstan temir joly» Ulttyq kompanııasynyń ókilderi bar.
Óz kezeginde, «Jolaýshylar tasymaly» AQ-nyń atqarýshy dırektory Asylhan Qaldykózov, bıletterdi ınternet arqyly satý júıesi men bılet avtomattarynyń jetildirilýi bıletter tapshylyǵyn joıýǵa septigin tıgizetin birden-bir faktor ekendigin atap ótti.
Kezdesý qorytyndysy boıynsha, temirjoldaǵy jolaýshylar tasymaly salasyndaǵy qosymsha zań aktilerin jetildirý, paıdalaný jáne qarjy kórsetkishteri boıynsha statıstıkalyq esepterdi jınaqtaý jáne óńdeý júıesin, «Ekspress-3» avtomattandyrylǵan basqarý jáne revızorlyq tekseris júıelerin jaqsartý, tarıftik emes stansylarda jol júrý bıletterin satý, álemdik ozyq tájirıbelerdi paıdalaný jáne taǵy basqa da máseleler boıynsha usynymdar ázirleý sheshildi.
