QR Kólik mınıstrligi Ýkraınanyń áýe kompanııasyna ushý saparlaryn «Eýro-2012» aıaqtalǵansha ǵana júzege asyrýǵa ruqsat berdi
ASTANA. 7 maýsym. QazAqparat - QR Kólik jáne kommýnıkatsııa mınıstrligi «Ýkraınanyń halyqaralyq áýejelileri» áýekompanııasyna 2012 jylǵy 6 maýsym men 10 shilde aralyǵynda Kıev - Almaty - Kıev baǵytyndaǵy ushý saparlaryn ýaqytsha júzege asyrýǵa ruqsat berdi.
Bul týraly mınıstrliktiń baspasóz qyzmetinen málim etti.
«Mundaı sheshimdi Qazaqstannyń áýe bıligi Ýkraınada fýtboldan ótetin Eýropa chempıonatyna baılanysty atalǵan ushý saparlaryna bılet satyp alǵan jolaýshylar tarapynan túsinispeýshilikti boldyrmaý maqsatynda qabyldap otyr», - delingen taratylǵan habarlamada.
Esterińizge sala keteıik, QR KKM Azamattyq avıatsııa komıteti Ýkraınalyq áýekompanııasyna atalǵan baǵytqa jaz mezgilinde ushý saparyn júzege asyrýǵa ruqsat bermeı otyr. Oǵan sebep, atalǵan kompanııanyń ruqsat berýge qajetti qujattardyń tolyq tizimin usynbaýynda.
«Ýkraınanyń halyqaralyq áýejelileri» áýekompanııasy Kıev - Almaty - Kıev baǵytyndaǵy turaqty ushýlarǵa ruqsat almaı turyp, atalǵan ushýlarǵa bılet satýdy júzege asyrǵanyn atap ótý kerek.
