QR QOQM elimizdiń 16 kásipornyna parnıktik gazdardy shyǵarýǵa sertıfıkattar berdi
ASTANA. 4 shilde. QazAqparat - QR Qorshaǵan ortany qorǵaý mınıstrligi 16 kásiporynǵa parnıktik gazdardy shyǵarýǵa sertıfıkattar berip, aldyn ala 40 ótinimdi maquldady,
dep habarlady «Jasyl Damý» AQ basshysy Sergeı Tsoı Primeminister.kz saıtyna bergen suhbatynda.
«Qazir mınıstrlik 16 sertıfıkat berdi, 40 kásiporynnyń ótinimderi de aldyn ala sertıfıkat alýǵa maquldanǵan», - dedi S.Tsoı.
Sonymen qatar, qalǵan kásiporyndarmen jumys jalǵasýda, konsýltatsııalar ótkizilýde. Olar qujattardy tapsyryp, qandaı da bir sanktsııalardy qoldanýsyz qatelerdi túzetedi.
Budan ózge, onyń aıtýynsha, 54 kásiporyn eshqandaı qujat tapsyrǵan joq. «Bul osy kásiporyndardyń jumysyn toqtatý boıynsha sharalar qoldanylýy tıis qaterler toby, sebebi merzim 1 mamyrda ótken», - dep tolyqtyrdy uıym basshysy.
S.Tsoı atap ótkendeı, sertıfıkattalmaǵan kásiporyndardyń jaýapkershiligi Ekologııalyq kodekste jazylǵan jáne ol sertıfıkat alǵanǵa deıin kásiporyn qyzmetin toqtatýdy qarastyrady.
Oǵan qosa, ol kóbine qujat tapsyrmaǵan energetıka jáne jylýmen qamtamasyz etý sektorynyń kásiporyndary ekenin basyp aıtty.
«Bul shaǵyn óńirlik jylý, energetıkalyq stansalar, olar óz jumysynda ne qarjylandyrýdy qarastyrmaǵan, ne olardyń esep júrgizetin ekologııa boıynsha shtattyq mamany joq», - dep qorytyndylady ol.
