QR QOQM Ekologııalyq retteý jáne baqylaý komıtetiniń laýazymdy tulǵalaryna qatysty taǵy bir qylmystyq is qozǵaldy - qarjy polıtsııasy
ASTANA. 21 maýsym. QazAqparat - Budan buryn habarlanǵandaı, aǵymdaǵy jylǵy 24 aqpanda QR ekonomıkalyq qylmysqa jáne sybaılas jemqorlyqqa qarsy kúres agenttigi Qorshaǵan ortany qorǵaý mınıstrliginiń Ekologııalyq retteý jáne baqylaý komıtetiniń laýazymdy tulǵalaryna qatysty qylmystyq is qozǵalǵan bolatyn.
Olar qorshaǵan ortaǵa zııandy zattardy tastaýǵa zańsyz ruqsat bergeni úshin 2 taý-ken kásiporynynyń ókilinen 100 myń AQSh dollary kóleminde para alý faktisi boıynsha aıyptalyp otyr.
Atalǵan qylmysty jasady degen kúdikpen 2012 jylǵy 28 aqpanda Ekologııalyq retteý jáne baqylaý komıteti tóraǵasynyń orynbasary S. Tórekeldıev ustaldy. Aǵymdaǵy jylǵy 1 naýryzda oǵan aıyp taǵylyp, 2 naýryzda ol sot sanktsııasymen qamaýǵa alyndy.
Oǵan qosa, aǵymdaǵy jylǵy 19 maýsymda Tórekeldıevke jáne Ekologııalyq retteý jáne baqylaý komıtetiniń ózge de laýazymdy tulǵalaryna qatysty qyzmettik ókilettigin teris paıdalaný faktisi boıynsha qylmystyq is qozǵaldy.
Qylmystyq ister tergelýde, ózge aqparat tergeý múddesine baılanysty jarııalanbaıdy.
