QR QM: MıG-31 ekıpajy erlik pen batyrlyq tanytyp, ushaqtyń eldi mekenge qulaýyna jol bergen joq
Bul týraly búgin QR Qorǵanys mınıstrliginde ótken brıfıng barysynda QR QK Áýe qorǵanysy kúshteri Maıdandyq avıatsııa basqarmasynyń ınspektory-aǵa ushqysh, polkovnık Talǵat Kenjebaev málim etti.
«Ushýdyń 10-shy mınýtynda, 22 saǵat 42 mınýtta Qaraǵandy áýe aımaǵynan 97 shaqyrym qashyqtyqta áýede shtattan tys jaǵdaı oryn alǵan. Ekıpaj komandıri ushýlar basshylyǵyna májbúrli katapýltalaný týraly baıandaǵan. Ekıpaj ushaqty eldi aımaq ústinen alyp ótip, aıdalaǵa aparyp tastap shyǵýǵa májbúr bolǵan. Ekıpaj komandıri polkovnık Edigeev ókinishke oraı qaıtys boldy. Ekıpaj shtýrmany maıor Galymzıanov parashıýtpen qonǵan kezde ortasha dárejeli jaraqat aldy. Qazir jaǵdaıy jaqsy», - dedi T.Kenjebaev.
Onyń atap ótýinshe, polkovnık Edigeev ekinshi synypty áskerı ushqysh. ıÝ.Gagarın atyndaǵy áskerı avıatsııa akademııasyn úzdik bitirgen. Jalpy ushý saǵaty - 1600. Atalǵan ushaqta 640 saǵat ushqan. Ushqysh barlyq meken jaıda kúndiz jáne túnde, kez kelgen aýa raıynda ushýǵa daıyndalǵan.
«Ekıpaj erlik pen batyrlyq tanytyp, saýatty áreket jasaǵan. Sońyna deıin ushaqty qutqarýǵa jáne jaǵdaı oryn alǵan aýdandaǵy Prostornoe eldi mekenine áýe kemesin qulatpaýǵa tyrysqan», - dedi ol.
Sonymen qatar polkovnıktiń sózine qaraǵanda, shtýrman Galymzıanov 3 myń metrlik bıiktikte tik ushý barysynda burylýdy oryndaǵannan keıin, ushaq kenetten solǵa qaraı aınala bastap, ony qatty ıirimge tartyp áketkenin aıtqan. Ekıpaj komandıri myń metrlik bıiktikke deıin ushaqty aman alyp qalýǵa áreket jasaǵan. Bul áreketinen eshteńe shyqpaǵannan keıin eldi mekennen ushaqty alyp ótip qana katapýltalanýǵa sheshim shyǵarǵan.
«Birinshi bolyp, maıor Galymzıanov jáne 0,4 sekýndtan keıin polkovnık Edigeev ushaqty tastap shyqqan. Ushaqtyń qulaý jyldamdyǵy óte úlken bolǵandyqtan Edigeevtiń parashıýtiniń tolyq ashylýyna bıiktik jetpegen», - dedi T.Kenjebaev.