QR QM armııanyń qalyptasýyna úles qosqan eki generaldy saltanatty túrde zapasqa shyǵaryp saldy
QR Qorǵanys mınıstrliginde ofıtserler úshin mańyzdy shara, ıaǵnı, jaýyngerlik týmen qoshtasý rásimi alǵash ret ótti. QR QM qurmet qaraýyly rotasy men tý ustaýshy toptyń qatysýymen generaldarǵa shekti jasqa jetýi boıynsha bosatý týraly buıryq oqyldy. General-maıor Jomart Kýanǵalıev pen Amanjol Ospanov kezekpen-kezek jaýyngerlik týdyń janyna kelip, bas ıdi. Osylaısha, olar týǵa áskerı sálem berdi.
«Shynymen de naǵyz komandırler, armııamyzdyń betke ustar generaldary áskerı qyzmetterin osymen aıaqtaýda. Olar áskerimizdiń qurylýynyń basy-qasynda bolyp, ózderiniń bilimderi jáne tájirıbelerimen táýelsiz memleketimizdiń áskerı salasy men qýatty qorǵanysynyń damýyna qomaqty úles qosty», - dedi QR Qorǵanys mınıstri Imanǵalı Tasmaǵambetov saltanatty rásim barysynda.
Shyǵaryp salý kezinde generaldardyń qalyptasýy men jetistikteri týraly derekti fılm kórsetildi.
General-maıor Jomart Qýanǵalıev QR QK Bas shtabynyń Ortalyq komandalyq pýnktin, general-maıor Amanjol Ospanov QR QK Qarý-jaraq bas basqarmasyn basqarǵanyn aıta keteıik, 40 jyl boıy áskerı qyzmetshiler jaýyngerlik sapta boldy. Onyń teń jartysynyń birshama jyldaryn qazaqstandyq armııanyń qalyptasýyna sarp etti. Olarmen birge qyzmet atqarǵan jaýyngerlik qarýlastary, QR Qarýly Kúshteriniń barlyq jeke quramy olardyń kóp jyldyq eńbekterine shyn júrekten alǵystaryn bildiredi.
«Joǵarǵy Bas Qolbasshyǵa, memleketke jáne halyqqa qyzmet etý joǵary abyroıdy ári qaraı da alyp júretinderińizge senimdimin. Bul aldaǵy eki aıtýly oqıǵa táýelsizdigimizdiń 25 jyldyǵy men QR Qarýly Kúshteriniń qurylýynyń 25 jyldyǵy qarsańynda erekshe mańyzdy. Sebebi, aldymyzda elimizdiń qorǵanys qabilettiligin qamtamasyz etýdegi jahandyq tapsyrmalar tur», - dep QR Qorǵanys mınıstri atap ótti.
General-maıor Jomart Qýanǵalıev Rostov joǵary áskerı komandalyq ýchılışesin jáne F. Dzerjınskıı atyndaǵy Áskerı akademııany támamdaǵan. Qazaqstandyq armııa qurylǵanǵa deıin zymyran áskerleriniń «ınjener-elektrıgi» joǵary áskerı-arnaýly bilimimen dıvızııadaǵy birden-bir qazaq ofıtseri bolǵan ol Altaı óńirinde qyzmet ótkerip, «podpolkovnık» shenine deıin qyzmet qylady. «KSRO QK-degi Otanǵa qyzmet etkeni úshin» ordeni, 3-dárejeli «Aıbyn», 2-dárejeli «Dańq» ordenderi bar. Kóptegen medaldarmen marapattalǵan. General-maıor Amanjol Ospanov Omby joǵary tankti ınjenerlik ýchılışesin jáne RF QM Brondy tankti áskerler áskerı akademııasyn bitirgen. 2-dárejeli «Aıbyn» ordenimen, mereıtoılyq jáne eńbek sińirgen jyldary úshin 8 medalmen marapattalǵan. Jastyq shaǵyna qaramastan, general-maıor Amanjol Ospanov qyzmetin Germanııada bastaǵan. Onda GKÁT rotasyn basqarǵan.
