QR KKM men «AtlasJet» 2014 jylǵy jazda týrısterdi tegin tasymaldaýǵa kelisti
ASTANA. QazAqparat - «AtlasJet» avıakompanııasy qazaqstandyq týrıstik agenttikterde rásimdelgen bıletteri bar jolaýshylardy tegin tasymaldaıtyn bolady.
«QR IJTM Týrızm ındýstrııasy komıteti tarapynan joldama men qonaq úı shyǵyndary tólengendigi týraly rastaý qujaty bar týrıster usha alady. Atalǵan kelisimge QR KKM Azamattyq avıatsııa komıtetiniń tóraǵasy Beken Seıdahmetov basshylyǵymen 19 shilde, senbi kúni ótken keńeste qol jetkizdi. Oǵan Týrızm ındýstrııasy komıteti tóraǵasy Marat Igalıev, «AtlasJet» avıakompanııasynyń prezıdenti Mýrat Ersoı jáne Ulttyq kásipkerler palatasynyń ókilderi qatysty», - delingen QR KKM habarlamasynda.
Sonymen qatar, keńeste 2014 jylǵy kóktemgi-jazǵy navıgatsııasy sońyna deıin «AtlasJet» avıakompanııasy aǵymdaǵy jylǵy 19 shildeden bastap Antalıadan Qazaqstanǵa turaqty reısterdi oryndaýdy jalǵastyratynyn atap ótken jón. Budan bylaı olardyń bıletteri jalpy brondaý júıesinde ashyq satylymda bolady.
