QR KKM kópirlerdi qurastyrýda polıýretandy tireý bólshekterin qoldanýdy bekitti

ASTANA. 7 qarasha. QazAqparat - Kólik jáne kommýnıkatsııa mınıstrligi jobalyq ınstıtýttarǵa Qazaqstandaǵy kópirlerdi qurastyrýdaǵy jańa jobalarda qazirgi bólshekterge qaraǵanda uzaq qyzmet etetin polıýretandy tireý bólshekterin qoldaný múmkindigin qaraýdy usyndy. Bul týraly QR KKM baspasóz qyzmetinen habarlandy.

«Qazaqstanda kópirler qurylymdaýshy qaǵıdaty boıynsha turǵyzylady, ıaǵnı eki tireýge bir arqalyq salynady. Kópirmen avtokólik júrgen kezde, osy eki bólshektiń qıysqan jerinde dınamıkalyq aýytqý paıda bolady. Bul aýytqýdy jumsartý qajet. Osy maqsatpen qazirgi kezde rezeńke tireý bólshekteri (RTB) qoldanýda. Biraq biz olardy polıýretandy bólshekterge aýystyrýdy usynyp otyrmyz. Onyń basty artyqshylyǵy - baǵasy rezeńke bólshek qunymen birdeı bola tura, ol uzaq qyzmet etedi», - dep atap ótti QR KKM Avtomobıl joldary komıteti tóraǵasynyń orynbasary Sátjan Ablalıev.

Avtomobıl joldary komıtetiniń ǵylymı-tehnıkalyq Keńesiniń jumysy barysynda jobalyq ınstıtýttarǵa RTB-niń ornyna polıýretandy bólshekterdi qoldaný usynyldy. Atap aıtqanda, «Astana-Pavlodar» avtojolynyń qurylysy jobasynyń sheńberinde salynatyn kópirler týraly sóz bolyp otyr.

Kópirlerge arnalǵan polıýretandy tireý bólshekteriniń geometrııalyq parametrleri rezeńke bólshekterge tolyq saı bolyp keletindikten jańalyqty engizýde eshqandaı tehnıkalyq problema joq.

Qazirgi kezde dúnıejúzilik kópir salý tájirıbesinde polıýretandy tireý bólshekterine qaraı betburys jasalýda.